बागलुङ - बागलुङ कालिका भगवती मन्दिर परिसरमा बुधबार देखी चैत्राष्टमी मेला सुरु हुँदै छ । हरेक वर्ष जस्तै यस वर्ष पनि चैते दशैंको अवसरमा मेलाको आयोजना गरिएको हो । यस वर्ष गुठी संस्थानको आयोजनामा धार्मिक सम्मेलन समेत हुने बताईएको छ । 
यसवर्षको चैत्राष्टमी मेला चैत्र २० गतेदेखि २५ सम्म आयोजना गर्न थालिएको बागलुङ कालिका भगवती गुठी व्यवस्थापन समितिका अध्यक्ष कुमार खड्काले जानकारी दिए । चैते दशैंका अवसमा कालिका भगवती मन्दिर दर्शनका लागि लाखौं दर्शनार्थीहरु आउने गरेका छन् ।
पर्यटन प्रवद्र्धन, संस्कृतिको संरक्षण, स्थानीय उत्पादनको प्रचारप्रसार र परम्पराको निरन्तरता दिने उद्देश्यले मेला आयोजना गरिँदै आएको गुठी व्यवस्थापन समितिका अध्यक्ष  खड्काले जानकारी दिए । पछिल्ला वर्षहरूमा विभिन्न ठाउँहरुमा व्यापारिक मेलाहरु आयोजना हुने गरेको भएपनि नेपालकै प्राचीन मेला मानिएको यो मेलाको आफ्नै महत्व र इतिहास रहेको पाका पुरानाहरु बताउछन् ।
चैते दशै मेलामा घरायसी प्रायोजनका सामाग्रीहरु डाला, नाङ्ला, ठेका, हातहतियार लगायतका बस्तुहरुको परम्पराकालदेखिनै किनमेल हुने गरेको छ । चैते दशैमा बागलुङ कालिका मन्दिरमा टाढा–टाढाका जिल्ला र भारतबाट समेत भक्तजनहरुको आगमन हुने गरेको छ ।  मेलामा पालिका स्तरीय पुरुष भलिवको बिजेतालाई नगद २ लाख ट्रफि, मेडल र प्रमाण पत्र, द्धितीय हुनेलाई नगद १ लाख ट्रफि, मेडल र प्रमाण पत्र, सेमिफाइनल पुग्ने समुहलाई नगद २५ हजार सहित मेडल र प्रमाणपत्र तथा उत्कृष्ट खेलाडिलाई नगद ५ हजार, ट्रफि र प्रमाण पत्र प्रदान गरिने भएको छ । त्यसैगरी खुल्ला महिला भलिबल प्रतियोगिता, छेलो प्रतियोगिता र दोहोरी गित प्रतियोगिता समेत आयोजना गरिएको कालिका भगवती गुठी व्यवस्थापन समितिका उपाध्यक्ष निशान खडकाले जानकारी दिए । मेलामा राष्ट्रिय कलाकारहरुको प्रस्तुती रहेने छ । मेलाको उद्घाटन गण्डकी प्रदेश सरकारका मुख्यमन्त्री सुरेन्द्रराज  पाण्डेले गर्ने छन ।