बागलुङ- आगामी चैत्र १६ गतेका लागि बागलुङ उद्योग बाणिज्य संघको १९ औं अधिवेशनको मिति तोकिएको छ । जसका लागि निर्वाचनको कार्यतालिका समेत सार्वजनिक गरिएको छ । उम्मेदवार मनोनयनको दर्ताको मिति नजिकिँदै गर्दा हाल सम्म नेतृत्व समाल्नका निम्ती ६ जना आकांक्षी देखिएका छन । अध्यक्ष पदको लागि वर्तमान बरिष्ठ उपाध्यक्ष राजन कुमार शाक्य, निवर्तमान बरिष्ठ उपाध्यक्ष तथा वर्तमान सदस्य उमाकान्त शर्मा ‘बाबु’ संघका पूर्व महासचिव दयाराम पौडेल, वर्तमान द्धितिय उपाध्यक्ष सञ्जय कुमार श्रेष्ठ, महासचिव ऋषिराम गा‌ैतम र कोषाध्यक्ष नवीन कुमार श्रेष्ठले अध्यक्ष पदका लागि आफुहरु आकांक्षी रहेको बताएका छन । आकंक्षीका ६ जना नै लामो समय देखी बागलुङमा व्यवसायी गर्दै आएका छन । उनिहरु मध्ये राजन कुमार शाक्य, उमाकान्त शर्मा ‘बाबु’ ऋषिराम गौतम र नविन कुमार श्रेष्ठ काँग्रेस समर्थक व्यवसायी हुन भने दयाराम पौडेल र सञ्जय कुमार श्रेष्ठ एमाले समर्थक व्यवसायी हुन । शाक्य र शर्मा संघको १८ औं अधिवेशनमा नै अध्यक्षका लागि आकांक्षी थिए । तर शाक्यले वर्तमान अध्यक्ष नरेश कंडेललाई समर्थन गरे भने शर्माले अर्को अध्यक्षका उम्मेदवार निर्माण कुमार श्रेष्ठ बासुलाई समर्थन गरेका थिए । अन्तिम समयमा पार्टी नेतृत्वले छलफल गरेर श्रेष्ठलाई व्याक गराई कंडेल सर्वसम्मत अध्यक्ष भएका थिए ।

बागलुङ उद्योग बाणिज्य संघमा विभिन्न दलप्रति आस्था राख्ने उद्योगी व्यवसायी रहेता पनि हाल सम्मको जानकारीमा काँग्रेस र एमाले समर्थक व्यवसायी मात्र नेतृत्वका लागि आकांक्षी देखिएका छन । नेकपा माओबादी समर्थक व्यवसायी भने हाल सम्म नेतृत्वमा आकांक्षी नरहेको र सदस्यहरुमा भने उम्मेदवारी दिने नेपाल राष्ट्रिय उद्योग व्यापार संगठनका अध्यक्ष मुकेशचन्द्र राजभण्डारी बताउँछन । त्यसैगरी अन्य दल प्रति आस्थावान उद्योगी व्यवसायी पनि नेतृत्वका लागि हाल सम्म आकांक्षी देखिएका छैनन ।

अध्यक्षका लागि आकांक्षी राजन कुमार शाक्य हाल संघको बरिष्ठ उपाध्यक्ष हुन । उनि २०६१ सालमा ११ औं अधिवेशन देखी बागलुङ उद्योग बाणिज्य संघको सदस्य भएर काम गरिरहेका छन । शाक्य संघको उप महासचिव, कोषाध्यक्ष प्रथम उपाध्यक्ष हुँदै वर्तमान कार्यसमितिको बरिष्ठ उपाध्यक्षमा रहेका छन । उनले आफु निरन्तर उद्योगी व्यवसायीको पक्षमा काम गर्दै आएको हुँदा १९ औं अधिवेशनमा आफु अध्यक्षको दाबी पेश गरेको बताए ।

संघको अध्यक्षका लागि अर्को आकांक्षी उमाकान्त शर्मा ‘बाबु’ बागलुङ बजारमा लामो समय देखी व्यवसाय संचालन गर्दै आएका हुन । २०६३ सालमा बागलुङ उद्योग बाणिज्य संघको कार्यसमिति सदस्य भएका थिए । उनी संघको १६औं अधिवेशनमा लोकप्रिय मत सहित सदस्यमा निर्वाचित भएर संघको उपमहासचिव भएका थिए । शर्मा १७ औं अधिवेशनमा पुन सदस्यमा निर्वाचित भएर बरिष्ठ उपाध्यक्ष भई काम गरे भने १८ औं अधिवेशनमा आफु नेतृत्वमा जान चाहेर पनि पुन सर्वसम्मत सदस्य भएर काम गरेको बताउँछन । उनि यस पटक आफुलाई अध्यक्षमा दाबी पेश गरेका छन ।

अध्यक्षकै अर्का आकंक्षी दयाराम पौडेल यस पटक पनि संघको नेतृत्वका लागि आफ्नो आकंक्षा रहेको बताएका छन । उनी संघको १७ औं अधिवेशनमा अध्यक्षका प्रत्यासी समेत हुन । उनि पूर्व अध्यक्ष युवराज राजभण्डारीसँग नेतृत्वका लागि चुनावी मैदानमा होमिएका थिए । निर्वाचनबाट त्यो बेला उनले पराजय भोग्नु परेको थियो । पौडेल २०५९ सालदेखी संघको सदस्य भएर काम गर्दै आएको बताउँछन । उनी हाल सम्म ४ पटक सदस्य भए भने १६ औं अधिवेशनमा जयराम भारी अध्यक्षमा निर्वाचित हुँदा महासचिव भएका थिए । हाल उनि नेपाल उद्योग बाणिज्य महासंघ गण्डकी प्रदेशको सदस्य रहेका छन । पौडेलले सर्वसम्मतको वातावरण बनेमा आफुले यस पटक संघको नेतृत्व गर्ने बताएका छन ।

अध्यक्षका लागि हालका द्धितिय उपाध्यक्ष सञ्जय कुमार श्रेष्ठले पनि आकांक्षा व्यक्त गरेका छन । संघको १४औं अधिवेशनबाट सदस्य भएका श्रेष्ठ निरन्तर संघका रहेर काम गर्दै आएका छन । जिल्लाको ग्रामिण भेग हिलबाट आफ्नो व्यवसाय सुरु गरेका श्रेष्ठले सदरमुकाममा व्यवसाय गर्दै आएको झण्डै १ दशक भएको छ । उनले यसपटक आफु पनि नेतृत्वका लागि आकांक्षी रहेको र संघलाई साझा संस्था बनाउनका निम्ती सर्वसम्मतको पनि प्रयास गरिएको बताए ।

अध्यक्षका लागि वर्तमान महासचिव ऋषिराम गौतमले पनि आकंक्षा व्यक्त गरेका हुन । उनि १८ औं महाविधेशनमा पहिलो पटक संघको सदस्य भएर महासचिव बनेका थिए । अध्यक्षकै लागि हालका कोषाध्यक्ष नविन कुमार श्रेष्ठले पनि आफु आकंक्षी रहेको बताएका छन । श्रेष्ठ संघको १७ औं अधिवेशनमा सदस्य भएर हाल कोषाध्यक्ष रहेका छन । उनि २०५४ साल देखी बागलुङ बजारमा व्यवसाय गर्दै आएको र यहाँका उद्योगी व्यवसायीको नेतृत्वमा रहेर काम गर्ने आफु ईच्छुक रहेको बताए ।

वर्तमान अध्यक्ष नरेश कंडेलले भने आफ्नो दोहोराउने कुनै इच्छा नरहेको र १९औं अधिवेशनमा सर्वसम्मत नयाँ नेतृत्व बनाउन आफु प्रयासरत रहेको बताए । उनले आफु पनि सर्वसम्मत भएको र अब नयाँ नेतृत्व पनि सर्वसम्मत गराउन सवै उद्योगी व्यवसायीसँग आन्तरिक छलफल चलिरहेको बताए ।

हाल सम्मको अवस्था हेर्दा संघको अध्यक्षमा ६ जनाको आकंक्षा रहेको देखिन्छ । नेकपा एमाले समर्थक २ जना र काँग्रेस समर्थक ४ जना व्यवसायी मध्ये नेतृत्व कसले समाल्ने हुन त्यसका लागि त निर्वाचन कुर्नुपर्ने नै हुन्छ । संघको निर्वाचनका लागि चैत्र १६ गते शनिबार मतदानका लागि समय निर्धारण गरिएको छ । निर्वाचन कार्यतलिका अनुसार चैत्र ११ गते उम्मेदवारी दर्ताको समय रहको छ । संघमा हाल कुल १ हजार ४२० उद्योगी व्यवसायी सदस्य छन् । सदस्यहरुले १ जना अध्यक्ष, विषयगतमा महिला उद्यमीतर्फ ३ सदस्य, उद्योगतर्फ २ सदस्य, वस्तुगततर्फ १ र खुल्लातर्फ १४ सदस्य गरी कुल २१ जनालाई मतदान गर्न पाउने छन् । संघमा निर्वाचित अध्यक्षले ४ जना मनोनित गरी कुल २५ सदस्यीय कार्यसमिति गठन हुने ब्यवस्था रहेको छ ।