बागलुङ- बिहिबार राती परेको भीषण वर्षासंगै खोलामा आएको बाढीले बगाउँदा बागलुङमा २ जनाको मृत्यु भएको छ भने एक जना वेपत्ता भएका छन । वागलुङ नगरपालिका वडा नं. ४ कुँडुले हुँदै बग्ने ब्रान्द्रेखोलामा आएको बाढीले बगाउँदा दुई जनाको मृत्यु भएको छ । बाढीमा परी एक जना हराईरहेका छन् ।
बाढीमा परी बानपा ४ कुँडुलेदेखी मालिकातर्फ जाँदै गरेको ध२प ८०१० नम्बरको मोटरसाइकल र घ१प ९९९६ नम्बर को स्कुटरमा सवार बान्द्रे अढाईथर बस्ने २३ वर्षिय अर्जुन सापकोटा र २२ वर्षिय अविशेक रेग्मीको मृत्यु भएको जिल्ला प्रहरी कार्यालय बागलुङका डिएसपी विजय यादवले जानकारी थिए ।

सापकोटा र रेग्मीको शव घटनास्थलबाट झण्डै १ सय मिटर तल फेला परेको यादवले बताए । दुईशव पोष्टमार्टमको लागि धौलागिरि अस्पतालमा ल्याईएको छ । यस्तै, बाढीले बगाउँदा सोही स्थानका २० वर्षिय कमल सापकोटा बेपत्ता छन् । बेपत्ता सापकोटाको खोजीकार्यमा प्रहरी निरीक्षक प्रताप पौडेल नेतृत्वको प्रहरी टोली घटनास्थलमा परिचालित भएको छ। बान्द्रेखोलामा आएको बाढीले मान्छे बगाएको खबर गरेलगत्तै प्रहरी घटनास्थलमा पुगेको थियो । बाढीले बगाएको स्कुटर सडक छेउमा फेला परेको छ भने मोटरसाइकलको खोजी भईरहेको प्रहरीले जनाएको छ