बागलुङ- गण्डकी प्रदेश स्तरीय तेस्रो जेसीज कप प्रतियोगिता आईतबार देखी  बागलुङमा सुरु भएको छ । बागलुङ जेसीजको आयोजनामा आयोजित प्रतियोगिताको बागलुङका प्रमुख जिल्ला अधिकारी नेत्रप्रसाद सुवेदीले उद्घाटन गरेका छन । सुवेदीले प्रतियोगिताको ट्रफि अनावरण गर्नुका साथै रेफ्रीलाई बल हस्तान्तरण गरेका थिए । 
प्रतियोगितामा ११ टिमको सहभागीता रहने आयोजक बागलुङ जेसीजका अध्यक्ष सुशान्तकष्ण श्रेष्ठले जानकारी दिए । फुटवललाई एक शक्तिशाली माध्ययमको रुपमा प्रयोग गरी वातावरण संरक्षणको विषयलाई प्रभावकारी रुपमा कार्यान्वयका निम्ती ‘एक गोल, एक बृक्ष, एक खेलाडी एक बृक्ष र एक सदस्य एक बृक्ष अभियान सहित प्रतियोगिता  संचालन गरिने छ  । फागुन २४ गते सम्म संचालन हुने प्रतियोगिताको प्रथम पुरस्कार २ लाख रुपैयाँ ट्रफि, मेडल र प्रमाणपत्र, द्धितिय पुरस्कार १ लाख रुपैयाँ  ट्रफि, मेडल र प्रमाणपत्र रहेको छ ।  प्रतियोगितामा सेमिफाईनलमा पुग्ने टिमलाई नगर १५÷१५ हजार रुपैयाँ, फियर प्ले टिमलाई ५ हजार रुपैयाँ र  ट्रफि उत्कृष्ट खेलाडी, उत्कृष्ट फरवार्ड, उत्कृष्ट मिडफिल्डर, उत्कृष्ट डिफेन्डर, उत्कृष्ट गोलरक्षक र मेन अफ दि म्याजलाई नगद पुरस्कार र  ट्रफिको व्यवस्था गरिएको छ ।  प्रतियोगतामा करिब १२ लाख रुपैयाँ खर्च हुने आयोजकले जनाएको छ । प्रतियोगिताबाट बचेको रकमबाट वातवरण संरक्षण कार्यमा लगानी गर्ने जेसीज बागलुङले प्रतिवद्धता जनाएको छ । उद्घाटन समारोहमा बोल्दै बागलुङका प्रमुख जिल्ला अधिकारी नेत्रप्रसाद सुवेदीले युवाहरुको आर्कषणको रुपमा रहेको जेसीज कप फुटबल प्रतियोगिता बागलुङको ब्राडको रुपमा स्थापित गर्नुपर्ने बताए । उनले विगतमा जिल्लास्तरीय भएता पनि यो वर्ष प्रदेश स्तरीय भएको र आगामी दिनमा राष्ट्रिय स्तरीय बनाउन सवैले प्रयत्न गर्नुपर्ने बताए । सुवेदीले जेसीजले फुटबलको माध्यमबाट गोल ग्रिन अभियानलाई जोडेको र यसले वातावरण संरक्षणमा समेत टेवा पुराउने बताए । 
कार्यक्रममा नेपाल जेसीजका राष्ट्रिय उपाध्यक्ष सौरभ श्रेष्ठ, नेपाल जेसीज क्षेत्र ख का लागि निरोपित राष्ट्रिय उपाध्यक्ष अभिषेक दुलाल, बागलुङ नगरपालिका वडा नं. २ का वडा अध्यक्ष सुरज बोसेल, नेपाल पत्रकार महासंघ बागलुङका सचिव नारायण रिजाल, जिल्ला फुटबल संघका अध्यक्ष जय राजभण्डारी, जेसीज बागलुङका पूर्व अध्यक्ष ऋषिराम गौतम लगायतले प्रतियोगिताको सफलताको कामना व्यक्त गरेका थिए । 
बागलुङ जेसीज वर्ष २०२५ का अध्यक्ष सुशान्तकृष्ण श्रेष्ठको अध्यक्षता निवर्तमान अध्यक्ष गणेश महतोको स्वागत र महासचिव सुलभ खड्काको संचालनमा सम्पन्न भएको थियो । प्रतियोगिताको पहिलो खेल सोमबार दिउँसो १ बजे बलेवा एफसी र हिकेर्स युनाईटेड विच हुने आयोजनकले जनाएको छ ।