बागलुङ- नेपाल मगर संघ बागलुङको आयोजनामा चौथो लखन विविध खेलकुद तथा सांस्कृतिक कार्यक्रम सोमबारदेखि सुरु भएको छ । चौथो लखन कप अन्तर्गत सोमबार खुला वडास्तरीय पुरुष भलिबल प्रतियोगिता सुरु भएको हो । प्रतियोगिताको नेपाल मगर संघ जिल्ला समन्वय समिति बागलुङका सल्लाहकार चन्द्रबहादुर थापाले उद्घाटन गरेका थिए । उद्घाटन खेलमा एलके भिलेज लेखानीले खेलकुद विकास समिति रायडाँडालाई २—१ सेटले पराजित गरेको छ । 
पहिलो सेट गुमाएको अवस्थाबाट उत्कृष्ट पुनरागमन गर्दै लेखानीले जीत आफ्नो पोल्टामा पारेको हो । पहिलो सेट २५—१६ ले खेलकुद विकास समिति रायडाँडालाई सुम्पिएको लेखानीले दोस्रो सेट २५—१९ र तेस्रो सेट २७—२५ ले आफ्नो पक्षमा पा¥यो । लखन कपमा समुह चरणका खेलहरु बेष्ट अफ थ्री का आधारमा खेलाईएको छ । अन्तिम तथा निर्णायक सेटमा रायडाँडा १९—१४ ले अगाडि रहेको अवस्थालाई उल्ट्याउँदै लेखानीले उद्घाटन खेलको नतिजा आफ्नो पक्षमा पारेको हो । 
सोमबार नै भएको अर्को खेलमा बागलुङ नगरपालिका—८ सिगानाले नेपाल मगर विद्यार्थी संघ धवलागिरि बहुमुखी क्याम्पस इकाई समितिलाई सोझो सेटमा पराजित गर्दै अघिल्लो चरणको यात्रा तय गरेको छ । सिगानाले २५—१७ र २५—२३ को जित हात पारेको हो । फागुन १४ सम्म चल्ने प्रतियोगितामा १६ समुहले भाग लिएको खेलकुद संयोजक किशोर थापाले जानकारी दिए । 
४३ औं मगर दिवसको अवसरमा आयोजित चौथो लखन कप विविध खेलकुद तथा सांस्कृतिक कार्यक्रम अन्तर्गत खुला वडास्तरीय पुरुष भलिबल प्रतियोगिता, खुला पालिकास्तरीय महिला भलिबल प्रतियोगिता, महिला, पुरुष लठो तान्ने प्रतियोगिता, महिला पुरुष छेलो फाल्ने प्रतियोगिता लगायतका कार्यक्रम आयोजना गरिएको नेपाल मगर संघ जिल्ला समन्वय समिति बागलुङका अध्यक्ष श्यामबहादुर पुनले बताए । 
भलिबल खेल फागुन १४ गतेसम्म सम्पन्न गर्ने र फागुन १५ गते मगर दिवसको सन्दर्भमा बागलुङमा बजारमा मगर भेषभुषा र संस्कार संस्कृति सहितको बृहत ¥यालीले बजार परिक्रमा गरी कालिका बाल उद्यानमा पुगेर मूल समारोहमा परिणत हुनेछ । रस्साकस्सी र छेलो प्रतियोगिता उक्त दिन आयोजना गरिनेछ । मुल समारोहलाई सम्बोधन गर्न नेपाल मगर संघका केन्द्रीय उपमहासचिव खेमबहादुर पुन आउने बताईएको छ ।