बागलुङ - बागलुङ नगरपालिकाद्वारा आयोजित मेयर कप फुटबल प्रतियोगिता तयारी अन्तिम चरणमा पुगेको छ । मंसिर १४ गतेदेखि १८ गतेसम्म बागलुङमा हुने मेयर कप फुटबल प्रतियोगिताको बिहीबार ट्रफी सार्वजनिक गरिएको छ । प्रतियोगिताको आयोजक बागलुङ नगरपालिका नगर खेलकुद विकास समितिले बिहिबार पत्रकार सम्मेलन गरि ट्रफी सार्वजनिक गरेको हो । नगरपालिकाका नगरप्रमुख बसन्तकुमार श्रेष्ठले ट्रफी सार्वजनिक गरे ।  
बागलुङ नगरपालिका–१ को बाङ्गेचौर खेलमैदानमा हुने प्रतियोगितामा आयोजक बागलुङ नगरपालिकाका दुई टिम सहित बागलुङका गलकोट नगरपालिका र जैमिनी नगरपालिका, म्याग्दीको बेनी नगरपालिका र उदयपुरको कटारी नगरपालिकाले सहभागिता जनाएका छन् । यस्तै पर्वतको जलजला गाउँपालिका र पैयुँ गाउँपालिका, विभागिय टिम गण्डकी प्रदेश प्रहरी पोखरा र कालिजंग गण, घोडाबाँधे सहभागी हुने प्रतियोगिताका संयोजक सुदिप गौतमले जानकारी दिए । प्रतियोगिता नकआउटका आधारमा खेलाइने उनको भनाई छ । 
प्रतियोगिताका संयोजक गौतमले प्रतियोगिताको ९० प्रतिशत तयारी पुरा भएको बताए । ‘प्रतियोगिताको अधिकांस तयारी पूरा भएको छ र कामको हिसाबले पनि अब ६० प्रतिशत काम सकिएको छ,’उनले भने,‘प्रतियोगितालाई सफलतापूर्वक सम्पन्न गर्ने काम मात्रै अब बाँकी रहेको छ ।’ प्रतियोगिताको विजेताले ३ लाख ३३ हजार ३ सय ३३ रुपियाँ र उपविजेताले २ लाख २२ हजार २ सय २२ रुपियाँ प्राप्त गर्ने छन् । यस्तै विधागत तर्फ सर्वोत्कृष्ट खेलाडी, सर्वाधिक गोलकर्ता, सर्वोत्कृष्ट गोलरक्षक र सर्वोत्कृष्ट प्रशिक्षकले १०–१० हजार रुपियाँ प्राप्त गर्नेछन भने प्रत्येक खेलको म्यान अफ द म्याच हुने खेलाडीले दुई हजार रुपियाँ प्राप्त गर्ने छन् । प्रतियोगितामा २० लाख खर्च हुने बागलुङ नगरपालिकाका नगरप्रमुख बसन्तकुमार श्रेष्ठले बताए । 
‘मेयर कप प्रतियोगिताका लागि हामी २० लाख रुपैयाँ बजेट विनीयोजना गरेका थियौं,’उनले भने,‘जतिसक्दो कम रकममा राम्रो कार्यक्रम गर्ने हाम्रो तयारी छ ।’ बागलुङ नगरपालिकाले २०७४ सालमा पहिलो र २०७६ सालमा दोस्रो मेयर कप फुटबल प्रतियोगिता संचालन गरेको थियो । तर, यस पटक तेस्रो मेयर कप फुटबल प्रतियोगिता हुनुपर्नेमा मेयर कप मात्र राखिको छ । पत्रकार सम्मेलनमा प्रश्न उठेपछि नगरप्रमुख श्रेष्ठले नगरपालिकाले २०७४ साल अगाडीका जनप्रतिनिधिहरुले मेयर कप गरे नगरेको खोजी गर्ने कार्य भइरहेकोले मेयर कप मात्र लेखिएको बताए । 
उनले पूर्वजनप्रतिनिधिहरुले आयोजना गरेको प्रतियोगिताको खोजी गरी कति औं हुन्छ सोही अनुसार राखिने बताए । प्रतियोगितामा सहभागी टिमले दुई जना विदेशि खेलाडी राख्न पाउने नगरप्रमुख श्रेष्ठले बताए । उनले जिल्लाका खेलाडीहरुले खेल प्रस्फुटन गर्न प्रतियोगिताले सहयोग पु¥याउने बताए । “जिल्लाका खेलाडीहरुले राष्ट्रियस्तरका खेलाडीसँग प्रतिस्पर्धा गरेपछि आफु भित्र रहेको प्रतिभा प्रस्फुटन गर्न सहयोग पुग्छ,” उनले भने,“प्रतियोगिताले जिल्लाका खेलाडीहरुलाई राष्ट्रिय स्तरसम्म पु¥याउन सहयोग पुग्ने अपेक्षा लिएका छौं ।”
बागलुङ नगरपालिका नगर खेलकुद विकास समितिका अध्यक्ष सुरज बोसेलले मेयर कप सम्पूर्ण बागलुङबासीको भएकाले सबैले जिम्मेबारीपूर्व सफल बनाउन अनुरोध गरे । बागलुङ नगरपालिकाको शिक्षा शाखा प्रमुख धनप्रसाद पोख्रेलले स्वागत गरेको कार्यक्रमको सञ्चालन शिक्षा अधिकृत पूर्णबहादुर घर्तीले गरेका थिए ।