बागलुङ - अविरल वर्षाका कारण पर्वतको कार्किनेटामा घरगोठ बगाउँदा वेपत्ता भएका दुई जना शव भेटिएको छ । फलेवास नगरपालिका वडा नं १ कार्कीनेटा पन्थेमा शनिबार दिउँसो ३ बजेको समयमा पहिरोले घरगोठ बगाउँदा दुई जना बेपत्ता भएका थिए । बेपत्ता भएकाको साँझ ७ बजे शव भेटिएको जिल्ला प्रहरी कार्यालय पर्वतका प्रहरी प्रमुख प्रहरी नायव उपरीक्षक खुमलाल भुसालले जानकारी दिए । 
 पहिरोले स्थानीय कुल प्रसाद पाध्याको घरगोठ बगाउँदा  ४० बर्षका झलक प्रसाद पौडेल र घरमा आफन्त आएका स्याङ्जाको  आधिखोला गाउँपालिका–३ का ३३ बर्षिय तुलसीराम पौडेल पहिरोमा बेपत्ता भएका थिए  । गोठका भैंसी, बाख्रा बचाउन गएको बेला बेपत्ता भएका थिए । 
मृतक तुलसीप्रसादको घटनास्थलदेखि १ सय मिटर तल खोल्सामा शव भेटिएको हो । झलकको भने खोलाले बगाएर आँधीखोला पु¥याएको अवस्थामा शव भेटिएको हो ।  दिउँसो साढे ३ बजेतिर घरदेखि १ सय मिटर माथिबाट खसेको पहिरोले गोठ सहितको संरचना बगाएको थियो । सुरुमा स्थानीयले घटनास्थलमै खोजी गरेका थिए । पछि बगेको अनुमान गरेर विभिन्न स्थानमा प्रहरी र स्थानीय परिचालन भएपछि शव भेटिएको हो । शव खोज्न स्याङ्जासम्मका प्रहरी र स्थानीय खटिएका थिए । घटनामा २ भैंसी, १ पाडो र ४ बाख्रा पनि बेपत्ता भएको प्रहरीले जनाएको छ ।  घर माथिबाट करिब ३ सय मिटर पहिरो गएको थियो ।