बागलुङ - धवलागिरि  बहुमुखी क्याम्पसले आफ्नो ६२ औँ वार्षिकोत्सव साताव्यापी कार्यक्रमका साथ मनाउन शुरु गरेको छ । क्याम्पसले मंगलवार पत्रकार सम्मेलनको आयोजना गरी साताव्यापी कार्यक्रमका साथ वार्षिकोत्सव मनाउन लागेको जानकारी गराएको हो ।
कार्यक्रमको पहिलो दिन मंगलवार पत्रकार सम्मेलन तथा क्याम्पसले गर्ने गतिविधि बारे जानकारी गराईएको थियो । कार्यक्रम अन्तर्गत विभिन्न खेलकुदहरु लङजम्प, त्रिपलजम्प,ठेलो, लठो तान्ने, बाल आश्रममा सहयोग गर्ने, फुटवल, भलिवल प्रतियोगिताका कार्यक्रम हुने क्याम्पस प्रमुख सह प्राध्यापक  डा. सुर्दशन सिलवालले जानकारी दिए । 
त्यसैगरी पूर्वविद्यार्थी जलपान, छात्रा भलिवल, मालढुङ्गादेखि क्याम्पससम्म म्याराथन दौड, छात्रा व्याडमेन्टन, टेवलटेनिस खो खो,प्राध्यापक र कर्मचारीविच म्युजिकलचियर प्रतियोगिता, वक्तृत्व कला प्रतियोगिता, नृत्य प्रतियोगिता निवन्ध तथा केश स्टडी, सरसफाई लगायतका कार्यक्रम रहेको क्याम्पस प्रमुख सिलवालले जानकारी दिए । 
पत्रकार सम्मेलनमा कार्यक्रमको वेवसाईड मार्फत उद्घाटन गर्दै क्याम्पस व्यवस्थापन समितिका अध्यक्ष प्रा. डा. दिन वाहादुर थापाले शैक्षिक गुणस्तर सुधार गरेर धौलागिरि बहुमुखी क्याम्पसले क्युएए प्राप्त गरेकाले समुदायसँग जोडिएको बताए । आगामी दिनमा क्याम्पसलाई अगाडी बढाउनका लागि वार्षिकोत्सव मार्फत विविध विषयमा छफलफल र विमर्श गरिने बताए । 
क्याम्पस प्रमुख सिलवालले क्याम्पसलाई अनुसन्धान केन्द्रको रुपमा विकास गर्न योजना रहेको बताए । विद्यार्थी टिकाई राख्नका लागि न्युन आय भएकालाई निशुल्क पढाईको व्यवस्था तथा रोजगार सृजना गर्ने बारे समेत छलफल चल्न थालेको बताए । 
मंगलवारदेखि मनाउन सुरु गरिएको वार्षिकोत्सव यहि माघ २१ गते सरस्वती पुजाको दिन मुल समारोह सहित समापन गरिने सहायक क्याम्पस प्रमुख हिरालाल रेग्मीले जानकारी दिए । पत्रकार सम्मेलन धवलागिरि बहुमुखी क्याम्पसका क्याम्पस प्रमुख सिलवालको अध्यक्षता, सहायक क्याम्पस प्रमुख उपप्रध्यापक हरि प्रसाद पाण्डेको स्वागत र सहायक क्याम्पस प्रमुख हिरालाल रेग्मीको सञ्चालनमा सम्पन्न भएको थियो ।