बागलुङ ! बागलुङ नगरपालिकाद्वारा आयोजित मेयर कप फुटबल प्रतियोगिता शुभारम्भ भएको छ । बागलुङ नगरपालिका–१ को बाङ्गेचौर खेलमैदानमा हुने प्रतियोगितामा आयोजक बागलुङ नगरपालिकाका दुई टिम सहित १० टिम सहभागि हुने नगर खेलकुद विकास समितिका संयोजक एवं वडा नं. २ का वडा अध्यक्ष सुरज बोसेलले जानकारी दिए । प्रतियोगितामा बागलुङका गलकोट नगरपालिका र जैमिनी नगरपालिका, म्याग्दीको बेनी नगरपालिका र उदयपुरको कटारी नगरपालिकाले सहभागिता जनाएका छन् । यस्तै पर्वतको जलजला गाउँपालिका र पैयुँ गाउँपालिका, विभागिय टिम गण्डकी प्रदेश प्रहरी पोखरा र कालिजंग गण, घोडाबाँधे सहभागी हुने बोसेलले जानकारी दिए ।  प्रतियोगिता नकआउटका आधारमा खेलाइने उनको भनाई छ । 
प्रतियोगिताको विजेताले ३ लाख ३३ हजार ३ सय ३३ रुपियाँ र उपविजेताले २ लाख २२ हजार २ सय २२ रुपियाँ प्राप्त गर्ने छन् । यस्तै विधागत तर्फ सर्वोत्कृष्ट खेलाडी, सर्वाधिक गोलकर्ता, सर्वोत्कृष्ट गोलरक्षक र सर्वोत्कृष्ट प्रशिक्षकले १०–१० हजार रुपियाँ प्राप्त गर्नेछन भने प्रत्येक खेलको म्यान अफ द म्याच हुने खेलाडीले दुई हजार रुपियाँ प्राप्त गर्ने छन् । प्रतियोगिताको उद्घाट गर्दै बागलुङ नगरपालिकाका नगरप्रमुख बसन्त कुमार श्रेष्ठले खेलकुद क्षेत्रको विकासका निम्ती स्थानिय सरकारको ठुलो भुमिका हुने बताए । उनले बागलुङ फुटबल भलिबल र क्रिकेटको हवको रुपमा विकास गर्नका निम्ती नगरपालिकाले खेलकुदका कार्यक्रमलाई प्राथमिकतामा दिएको बताए । उनले मेयर कप प्रतियोगिताले समग्र बागलुङको पर्यटन विकासको लागि समेट टेवा पुराउने बताए । 
‘मेयर कप बागलुङको पहिचानकै रुपमा रहेको छ । यहाँबाट खेल खेल्दै राष्ट्रिय तथा अन्तराष्ट्रिय स्तरमा पनि खेलाडी पुगेका छन । खेलाडी उत्पादनका लागि  प्रतियोगिताले प्रोत्साहन गर्ने छ । प्रतियोगिताले बागलुङको पहिचान उचो बनाउन सहज हुने छ ।  प्रतियोगितामा २० लाख खर्च हुने अनुमान गरिएको छ ।  
बागलुङ नगरपालिकाले २०७४ सालमा पहिलो र २०७६ सालमा दोस्रो मेयर कप फुटबल प्रतियोगिता संचालन गरेको थियो ।  यो तेस्रो मेयर कप प्रतियोगिता रहेको छ । प्रतियोगिताका सम्पुर्ण संयोजन नगरखेलकुद विकास समितिले गरेको छ । प्रतियोगितामा सहभागी टिमले दुई जना विदेशि खेलाडी राख्न पाउने प्रतियोगिताका संयोजक सुदिप गौतमले जानकारी दिए ।  
आईतबार पहिले खेल जलजला गाउँपालिका पर्वत र आयोजक बागलुङ नगरपालिका निलो विच भएको छ । जलजलालाई बागलुङले ५–० को अन्तरले पराजित गरेर अगाडी बढेको छ । खेलको छैठौं मिनेटमा बागलुङका दिप्लभ जिसीले गोल गर्दै आयोजक टिमलाई अग्रता दिलाएका थिए । डिबक्स भित्रबाट राजिव श्रीसले दिएको उत्कृष्ट पासलाई जिसीले गोलमा परिणत गरे । खेलको ३८ औं मिनेटमा पेनाल्टी बक्सबाट बरदान थापाले गोल गर्दै बागलुङलाई पहिलो हाफमा २–० को अग्रता दिलाए । 

बागलुङ नगरपालिकाका लागि खेलको ४९ औं मिनेटमा सुशिल मगर र ५८ औं मिनेटमा सौरभ गौतमले गोल गरे भने ७३ औं मिनेटमा आयुष पौडेलले गोल गरेरे विपक्षी जलजलामाथि दबाब कायम गरेको थियो । खेलको प्लेयर अफ द म्याच विजेता टिमका कप्तान निशान थापा घोषित भएका छन । उनलाई  नगद २ हजारसहित ट्रफी प्रदान गरिएको छ । 
सोमबार तीन खेल हुने प्रतियोगिताका संयोजक सुदिप गौतमले बताए । पहिलो खेल जैमिनी नगरपालिका बागलुङ विरुद्ध बेनी नगरपालिका म्याग्दी, दोस्रो खेल गलकोट नगरपालिका बागलुङ विरुद्ध गण्डकी प्रदेश प्रहरी पोखरा र तेस्रो खेल कालीजङ्ग गण घोडाबाध ेविरुद्ध पैयुँ गाउँपालिका पर्वतका बिच हुने छ ।
प्रतियोगिता उद्घाटन कार्यक्रममा बागलुङका प्रमुख जिल्ला अधिकारी कुमानसिंह गुरुङ, नगरपालिकाका प्रमुख प्रशासकिय अधिकृत ईश्वरी प्रसाद शर्मा, जिल्ला खेलकुद विकास समितिका अध्यक्ष कृष्ण प्रसाद कंडेल बागलुङ नगरपालिका वडा नं. १ का वडा अध्यक्ष जयबहादुर केसी लगायतले बोलेका थिए । 
कार्यक्रम नगर खेलकुद विकास समितिका अध्यक्ष सुरज बोसेलको अध्यक्षता, नगरशिक्षा अधिकारी धनप्रसाद पोखरेलको स्वागत र पत्रकार ताराप्रसाद शर्माको संचालनमा सम्पन्न भएको थियो ।