मुस्ताङ-  गण्डकी प्रदेशका मुख्यमन्त्री सुरेन्द्रराज पाण्डेले बाढिले प्रभावित क्षेत्र मुस्ताङको कागवेनीको पुन निर्माणका लागि गण्डकी प्रदेश सरकारले सबै प्रयास केन्द्रित गर्ने बताएका छन् । उनले बाढीले कागवेनी क्षेत्रमा ठुलो क्षती पुगेकाले संघिय सरकार र स्थानीय सरकारको सहकार्यमा पुननिर्माणमा ध्यान दिने बताए । ‘प्रदेश सरकारको स्रोत साधनले भ्याएसम्म सघाउने र दातृ निकायसँग पनि प्रदेश सरकारले सहकार्य गरेर कागवेनी पुन निर्माण गर्नेछ’ उनले भने– ‘यसकालागि प्रदेश सरकारले संघ सरकारसँग समन्वय गरिरहेकोछ हामी पुनःनिर्माणको काम छिट्टै नै अगाडी बढाउने छौं, ‘प्राकृतिक विपत्तीसँग हामीले जुध्न सक्दैनौँ तर यसबाट शिक्षा लिएर अबको पुन निर्माणमा ध्यान दिनुपर्छ ।’  क्षतीग्रस्त कागवेनी क्षेत्रको निरीक्षण गर्दै उनले बाढीले भत्काएका सामाजिक तथा ब्यक्तिगत संरचनाहरु, गुम्बा, धर्मशाला लगायत सवै संरचना पुनःनिर्माणमा जोड दिनुपर्ने बताए । 
बिगतका वर्षभन्दा यस वर्ष गण्डकी प्रदेश सरकारले मनाङ, मुस्ताङ लगायत उच्च हिमाली जिल्लामा योजना र बजेटलाई वृद्धी गरेको बताउँदै मुख्यमन्त्री पाण्डेले आवश्यकता धेरै, प्रदेशको स्रोत साधन थोरै हुँदा सबै अपेक्षा एकै पटक पुरा गर्न नसकिएको बताए । ‘प्राथमिकताका आधारमा तपाईहरुले छुट्याएका योजना क्रमस प्रदेश सरकारले पुरा गर्दै जानेछ’ उनले भने ।
पुन निर्माणकालागि प्रदेश सरकारबाट सहयोगको अपेक्षा रहेको बताउँदै स्थलगत निरीक्षणमा मुख्यमन्त्री सहभागी भएको भन्दै बिस्थापित, प्रभावित, जनप्रतिनिधि लगायत स्थानीयले धन्यवाद दिएका थिए । साउन २८ गते बाढी आएलगत्तै हेलिकप्टरमा स्थलगत निरीक्षण गर्न आउने तयारी रद्ध गरी मुख्यमन्त्री पाण्डेले हेलिकप्टर भाडामा तिर्ने पैसा कागवेनीको उद्धार र राहतमा पठाएको तत्कालिन समयमा सदनमा समेत जानकारी गराएका थिए ।
बाढीलगत्तै कागवेनीको उद्धार र राहतकालागि गण्डकी प्रदेश सरकारले अवरुद्ध सडक खुलाएर इन्धन ढुवानी, टेन्ट, कम्बल लगायतका सामग्री उपलब्ध गराएको थियो ।  क्षतीको पूर्ण विवरण जिल्लाबाट प्रदेश आएपछि थप आर्थिक सहयोगपनि पठाईने मुख्यमन्त्री पाण्डेले बताएको प्रेस संयोजक नरहरी सापकोटाले जानकारी दिए ।  बाढीग्रस्त क्षेत्रमा उद्धार, राहत, खानेपानीको व्यवस्थापनमा प्रदेश सरकारले तत्काल सहयोग गरेको थियो । बस्तीको दायाँबायाँ तटबन्धन गरिदिन स्थानीयले माग गरेका छन् । प्रदेश सरकारले तटबन्धनका लागि पनि सहयोग गर्ने जनाएको छ  ।