बागलुङ- नेपाल पत्रकार महासंघ बागलुङले पत्रकार लेखनवृत्ति कोषको घोषणा गरेको छ । शनिबार एक समारोहका बीच लेखनवृत्ति कोषको घोषणा गरेको हो । उक्त घोषणा कार्यक्रममा बोल्दै गण्डकी प्रदेश सभाका उपसभामुख बिना कुमारी थापाले समाजमा नकारात्मक बढेकाले त्यसलाई चिर्नका लागि पत्रकारले भूमिका खेल्नुपर्ने बताईन् । 
‘अहिले समाजमा चरम निराशा छाएको छ, निराशाको खेतीले समाजलाई अन्धकारतर्फ धकेल्दैछ,’उनले भने,‘यसलाई चिर्नका लागि पत्रकार जगतको सबैभन्दा ठूलो भूमिका रहन्छ । समाजलाई सकरात्मक बनाउनका लागि यहाँहरुको भूमिका अब्बल हुने विश्वास राख्छु ।’ उनले समाजमा आशा लगाउने कार्यमा लाग्न पत्रकारलाई आग्रह गरिन् । ‘समाजमा आशा र भरोसा जगाउने काममा सत्यतथ्य सूचनाका माध्यमबाट तपाईहरुले गर्नुपर्छ,’ उनले भनिन् । 
उनले पछाडि पारिएको क्षेत्रको बारेमा विशेष कलम चलाउन समेत आग्रह गरिन् । ‘पत्रकारको कलम सबै क्षेत्रका लागि चल्नुपर्छ, त्यसमा पनि पछाडि पारिएको क्षेत्र र समुदायका लागि विशेष चल्नुपर्छ,’उनले भनिन्,‘महिला बालबालिका, आदिवासी जनजाति, दलित समुदायको बारेमा विशेष रुपमा कलम चलाउन म यहाँहरुलाई आग्रह गर्छु ।’ कार्यक्रममा नेकपा एमाले गण्डकी प्रदेश सभा संसदीय दलका प्रमुख सचेतक गोविन्द नेपालीले समयक्रमसंगै आफुलाई ढाल्न नसक्नेहरु हराएर जाने उल्लेख गरे । 
‘समय अवस्थासंगै आफुलाई परिवर्तन गर्न नसक्नेहरु हराउने अवस्था आउँछ,’ उनले भने,‘पत्रकारले पनि आफुलाई समय अनुसार अपडेट गर्नुपर्छ । समयको बेगलाई बुझ्न सक्नुपर्छ ।’ नेकपा माओवादी केन्द्र गण्डकी प्रदेश सभाकी प्रमुख सचेतक कुशुम बुढाले पत्रकारले समाजको पथप्रदर्शकको भूमिका खेल्नुपर्ने बताईन् । ‘समाजलाई कुन बाटोमा डो¥याउने भन्ने विषयमा पत्रकारको महत्वपूर्ण हात रहन्छ,’उनले भनिन्,‘समाजलाई सही गति दिनका लागि पत्रकारले गम्भीरता देखाउनुपर्छ ।’ 
कार्यक्रममा नेपाल पत्रकार महासंघ गण्डकी प्रदेश उपाध्यक्ष प्रकाश पौडेल, गल्कोट नगरपालिकाका नगरप्रमुख भरत शर्मा गैरे, नेपाली काँग्रेसका जिल्ला सदस्य महेन्द्र आचार्य, नेकपा एमालेका जिल्ला अध्यक्ष हिराबहादुर केसी, बागलुङका प्रमुख जिल्ला अधिकारी नेत्रप्रसाद सुवेदी, पत्रकार महासंघ बागलुङका पूर्व अध्यक्ष रामबहादुर जिसी, पत्रकार महासंघ म्याग्दीका अध्यक्ष हरिकृष्ण गौतमले मंतव्य व्यक्त गरेका थिए ।
 प्रेस युनियन बागलुङका अध्यक्ष संगम घर्ती मगर, प्रेस चौतारी बागलुङका अध्यक्ष कमल पौडेल, प्रेस सेन्टर बागलुङका सचिव बिनोद, प्रगतिशिल पत्रकार संघ नेपालका केन्द्रिय सचिव ताराप्रसाद शर्मा, गैरसरकारी संस्था महासंघका अध्यक्ष मुक्तिराम सापकोटा र पुरस्कृत व्यक्तित्व रामकृष्ण बोहोराले पनि शुभकामना मन्तव्य व्यक्त गरेका थिए । कार्यक्रम पत्रकार महासंघ बागलुङका अध्यक्ष राम थापाको अध्यक्षता, उपाध्यक्ष सुवास आचार्यको स्वागत र सचिव नारायण रिजालको संचालनमा सम्पन्न भएको थियो । 

पहिलो दिन चार लाख रुपैयाँ संकलन
कोषमा सहयोग गर्नेहरुको रकमका बारेमा महासंघका उपाध्यक्ष सिर्जना पन्तले जानकारी गराएकी थिइन् । लेखनवृत्ति कोषमा पहिलो दिन चार लाख रुपैयाँ संकलन भएको पत्रकार महासंघ बागलुङ शाखाका कोषाध्यक्ष खेमराज गौतम सुवासले जानकारी दिए । मंसिर २८ मा निर्वाचित पत्रकार महासंघ बागलुङको नयाँ नेतृत्वले पहिलो बैठकबाट लेखनवृत्ति कोष स्थापना गर्ने निर्णय गरेको थियो । 
पत्रकार महासंघका पदाधिकारी तथा सदस्यहरु मार्फत जम्मा भएको रकम १ लाख ५५ हजार सहित देश तथा बिदेशमा रहेका पत्रकारहरु र कार्यक्रममा उपस्थितबाट संकलित रकम गरि हालसम्म ४ लाख रुपैया संकलन भएको कोषाध्यक्ष गौतमको भनाई छ । कोषमा १० लाख पु¥याउने लक्ष्य रहेको र १० लाख पुगेपछि संकलन अभियान रोकिने र प्रत्येक बर्ष सोही रकमको व्याजबाट खोज पत्रकारीतामा लागेका पत्रकारलाई पुरस्कृत गरिने अध्यक्ष राम थापाले बताए ।
 ‘हामीले यसलाई कुनै वित्तीय संस्थामा राखेर त्यसबाट आउने व्याजबाट वार्षिक दुई जना पत्रकारलाई खोज समाचार लेखनका लागि कम्तीमा ५०÷५० हजार राशीको फेलोसिप प्रदान गर्ने सोंचमा छौं,’उनले भने,‘यसले हाम्रो पत्रकारलाई पेशामा टिकाउनका लागि खोजी पत्रकारिता गर्नका लागि महत्वपूर्ण सहयोग पुग्नेछ ।’ 

दुई पत्रकार पुरस्कृत
बागलुङका दुई पत्रकार पुरस्कृत भएका छन् । नेपाल पत्रकार महासंघमा स्थापित दुई फरक फरक अक्षयकोषबाट राससकर्मी डम्मर बुढामगर सहित गोरखापत्रकर्मी रामृकष्ण बोहोरा पुरस्कृत भएका हुन् ।  बुढामगर राष्ट्रिय समाचार समिति (रासस)का स्थानीय समाचारदाता र नेपाल पत्रकार महासंघ बागलुङका सह–सचिव समेत छन् । नेपाल पत्रकार महासंघ बागलुङ शाखामा स्थापित ‘विकास पौडेल स्मृति पत्रकारिता पुरस्कार कोष’बाट नगद पाँच हजार र सम्मान पत्र सहित बुढामगर पुरस्कृत भए ।

शनिबार लेखनवृद्धि कोष घोषणा समारोहमा गण्डकी प्रदेशका उपसभामुख बिना कुमारी थापाबाट बुढामगर र बोहोरालाई पुरस्कार समर्पण गरिएको हो । २०८० सालमा स्थापित पुरस्कार कोषबाट पहिलो पटक बुढामगर सम्मानित भएका हुन् । पत्रकार महासंघ बागलुङका साधारण सदस्य रहेका विकास पौडेल कोरोनाका कारण मृत्युभएपछि उनको परिवारले महासंघमै पत्रकारिता पुरस्कार कोष स्थापना गरेका थिए । 
एक दशकदेखि बागलुङको पत्रकारितामा सक्रिय बुढामगर २०७९ सालदेखि राससमा ढोरपाटन संवाददाताको रुपमा कार्यरत छन् । बुढामगर पत्रकार महासंघ बागलुङका सह–सचिवका साथै नेपाल प्रेस युनियन बागलुङका सचिव हुन् । पत्रकार मित्रलाल खरेल र सिता खरेलद्वारा स्थापित ‘टिका धन खोज पत्रकारिता पुरस्कार–२०८१’ बाट गोरखापत्रकर्मी तथा ढोरपाटन पत्रिकामा कार्यरत पत्रकार रामकृष्ण बोहोरा नगद रु. १० हजार सहित पुरस्कृत भएका छन् ।
 विसं २०७७ सालमा पत्रकार मित्र खरेलका आमा धन कलि खरेल र बुबा टिकाराम खरेलको नाममा स्थापित सो पुरस्कार दोस्रो पटक बोहोरालाई प्रदान गरिएको हो । बोहोरा २२ बर्षदेखि पत्रकारितामा सक्रिय छन् । यसअघि एभिन्युज संवाददाता रोजश चन्द्र राजभण्डारीलाई प्रदान गरिएको थियो ।