बागलुङ - आईतबार देखी बागलुङमा तेस्रो जेसीज कप फुटबल प्रतियोगिता हुने भएको छ । गण्डकी प्रदेश स्तरीय फुटबल प्रतियोगितामा ११ टिमको सहभागिता रहने आयोजक बागलुङ जेसीजले जनाएको छ । युवाहरुको क्षमता र नेतृत्व विकासमा सक्रिय रहेको बागलुङ जेसीजले विभिन्न युवा केन्द्रीत तथा समाज रुपमान्तरणका कार्य गर्दै आएको छ । सोही अनुसार पछिल्लो समयमा युवाहरुकै आर्कषणको रुपमा रहेको फुटबल खेललाई प्रवद्र्धन गर्ने उद्देश्यका साथ हरेक वर्ष प्रतियोगिताको आयोजना गर्ने जेसीज बागलुङका अध्यक्ष सुशान्तकृष्ण श्रेष्ठले जानकारी दिए । 
प्रतियोगिता फागुन १८ गते देखी २४ गते सम्म संचालन हुनेछ । प्रतियोगितालाई फरक सन्देश दिने उद्देश्यका साथ वातावरण संरक्षणको सन्देश पनि प्रवाह गर्ने अध्यक्ष श्रेष्ठले बताए । उनले फुटवललाई एक शक्तिशाली माध्ययमको रुपमा प्रयोग गरी वातावरण संरक्षणको विषयलाई प्रभावकारी रुपमा कार्यान्वयका निम्ती ‘एक गोल, एक बृक्ष, एक खेलाडी एक बृक्ष र एक सदस्य एक बृक्ष अभियान संचालन गरिने छ । प्रतियोगितामा करिब १२ लाख रुपैयाँ खर्च हुने आयोजकले जनाएको छ । 
प्रतियोगिताको प्रथम पुरस्कार २ लाख रुपैयाँ ट्रफि, मेडल र प्रमाणपत्र, द्धितिय पुरस्कार १ लाख रुपैयाँ  ट्रफि, मेडल र प्रमाणपत्र रहेको छ ।  सेमिफाईनलमा पुग्ने टिमलाई नगर १५/१५ हजार रुपैयाँ, फियर प्ले टिमलाई ५ हजार रुपैयाँ र  ट्रफि उत्कृष्ट खेलाडी, उत्कृष्ट फरवार्ड, उत्कृष्ट मिडफिल्डर, उत्कृष्ट डिफेन्डर, उत्कृष्ट गोलरक्षक र मेन अफ दि म्याचलाई नगद पुरस्कार र  ट्रफिको व्यवस्था गरेको जेसीज बागलुङका महासचिव सुलभ खड्काले जानकारी दिए  । प्रतियोगिताको क्रममा हुने सक्ने सम्भावित दुर्घटनालाई मध्यनगर गरी नेको इन्स्युरेन्सले खेलाडीको १ लाख बराबरको विमा गरिदिने आयोजकले जनाएको छ । प्रतियोगिताबाट बचेको रकमबाट वातवरण संरक्षण कार्यमा लगानी गर्ने जेसीज बागलुङले प्रतिवद्धता जनाएको छ । 
पत्रकार सम्मेलनमा नेपाल पत्रकार महासंघ बागलुङका उपाध्यक्ष सुवास आचार्यले युवाहरुको आर्कषणको रुपमा रहेको फुटबल खेललाई बागलुङ जेसीजले निरन्तरता दिएको बताए । उनले कार्यक्रम सफलताको कामना व्यक्त गरे । 
जेसीज बागलुङका अध्यक्ष सुशान्तकृष्ण श्रेष्ठको अध्यक्षता महासचिव सुलभ खड्काको संचालनमा पत्रकार सम्मेलन कार्यक्रम सम्पन्न भएको थियो ।