काठमाडौं । जापानमा रही समाज सेवा र गीत–संगीतका माध्यमबाट चिनिनुभएकी मोडल तथा समाजसेवी कल्पना क्षेत्रीले आफूले कमाएको पैसा समाज सेवा र गीत–संगीतमा खर्च गर्न पाउँदा अत्यन्तै खुसी लागेको बताउनु भएको छ।

हालै सार्वजनिक भएको आफ्नो नयाँ गीत आलाराम को चर्चा चलिरहेकै बेला पिपुल मिडिया सँग कुरा गर्दै कल्पना क्षेत्रीले गीतले नेपालीहरूले जापानमा भोग्ने वास्तविकतालाई चित्रण गर्ने प्रयास गरेको बताउनुभयो। उहाँले लगानी र अभिनय दुवै गर्नुभएको यस गीतलाई टिकटक मा दर्शकहरूले अत्यधिक माया गरिरहेका छन्। समाचार तयार पार्दासम्म यस गीतमा ७० हजारभन्दा बढी भिडियोहरू बनिसकेका छन्।

विगत लामो समयदेखि समाज सेवामा सक्रिय कल्पना क्षेत्रीले आफूले संकलन गरेको रकम समाज सेवामा खर्च गर्न पाउँदा सन्तुष्टि मिल्ने बताउनुभयो। उहाँको भर्खरै सार्वजनिक गीतमा नेपाली युवायुवतीले जापानमा भोग्नुपरेका विभिन्न घटनाहरूलाई मुख्य विषयवस्तु बनाइएको छ।

नेपालबाट रोजगारीका लागि जापान जाने नेपालीहरूको कथालाई आधार बनाएर तयार पारिएको यस गीतमा सीमा नेपालीको सुमधुर स्वर सुन्न सकिन्छ भने प्रेम सापकोटाले लय तथा शब्द सिर्जना गर्नुभएको छ। उत्कृष्ट शब्दलाई मिठासपूर्ण लयले थप आकर्षक बनाएको प्रशंसकहरूको भनाइ छ।

तेजेन्द्र भण्डारीको निर्देशनमा जापानमै छायांकन गरिएको म्युजिक भिडियोमा कल्पना क्षेत्रीको मनमोहक अभिनय देख्न सकिन्छ। साथै, उनी यस गीतकी निर्मात्री पनि हुन्। आलाराम गीत कल्पना क्षेत्रीको आधिकारिक युट्युब च्यानलमार्फत सार्वजनिक गरिएको छ।