बागलुङ -  आफ्ना बाबाको स्मरणमा यहाँका एक परिवारले मन्दिरमा चौतारी निर्माण गरेका छन । जिल्लाको बागलुङ नगरपालिका—१३ पैयुँपाटा सिम्लेका नारायण पौडेल र उनको परिवारले आफ्ना बाबा स्व. जनकराज पौडेलको सम्झनामा बलेवाकै प्रसिद्ध भैरवस्थान मन्दिर परिसरमा चौतारी निर्माण गरेका हुन । लायन्स क्लब अफ बागलुङ कालिका वर्ष २०२३।०२४ का अध्यक्ष समेत रहेका पौडेलको परिकल्पनामा आफ्ना बाबुको किर्ती स्मरणार्थ दाजु झलकराज शर्मा (शिव) र भाई प्रकाश पौडेलको संयुक्त पहलमा मन्दिर परिषर भित्र लायन्स चौतारी निर्माण गरेका हुन । 
    बलेवा क्षेत्रकै प्रमुख शक्तिपिठको रुपमा रहेको भैरवस्थान मन्दिर आउने धार्मिक पर्यटकका लागि विश्रामस्थलको रुपमा चौतारी निर्माण गरिएको हो ।  स्लेट ढुंगा विछ्याएर निर्माण गरिएको चौतारी निकै आर्कषण देखिएको छ । 

    चौतारीको शुक्रबार लायन्स क्लब इन्टरनेशनल ३२५ के का गर्भनर मिलन थापाले उद्घाटन गरेकी हुन । उद्घाटन कार्यक्रममा बोल्दै थापाले लायन्स जस्तो सामाजिक क्षेत्रमा क्रियाशिल संस्थामा सक्रिय व्यक्तिहरुले मन्दिरमा आउने दर्शनार्थीका लागि लक्षित गरी बनाईएको चौतारीले झनै पुण्य कमाउने काम भएको बताईन । थापाले धौलागिरी क्षेत्रकै प्रसिद्ध शक्तिपिठमा भैरवस्थान मन्दिरको पर्यटन प्रवद्र्धनका निम्ती पनि लायन्स क्लबहरुले थप सहयोग गर्ने बताईन । 
लायन्स क्लबले मन्दिरका लागि एक थान कम्प्युटर र फोटोकपी सहितको प्रिन्टर पनि प्रदान गरेको छ । बागलुङ नगरपालिका—१३ पैयुँपाटा घर भै हाल बागलुङ बजारमा व्यवसाय गर्दै आएका आशोक सुनारको सहयोगमा कम्प्युटर र प्रिन्टर मन्दिरका लागि हस्तान्तरण गरिएको क्लबका अध्यक्ष नारायण पौडेलले जानकारी दिए । नवनिर्मित चौतारीमा ‘फोनेक्सप्लाम’ का विरुवा रोपिएको छ ।  
कार्यक्रममा बागलुङ नगरपालिका—१२  अमलाचौरका वडा अध्यक्ष कोपिलामणी शर्मा, भैरवस्थान मन्दिर गुठी व्यवस्थापन समितिका अध्यक्ष ज्ञानेन्द्र ढकाल, लायन्स क्लब बागलुङ कालिकाका पुर्व अध्यक्ष नरेश कंडेल लगायतले चौतारी निर्माणको काम र कम्प्युटर सहयोगले मन्दिरको विकासका लागि थप टेवा पुगेको बताए ।  
कार्यक्रम क्लबका पुर्व अध्यक्ष नारायण पौडेलको अध्यक्षता, पुर्व अध्यक्ष तथा रिजन चियर पर्सन बद्री ढुंगानाको स्वागत र क्लबका वर्ष २३।२४ का सचिव मिनबहादुर केसी मिलनको संचालनमा सम्पन्न भएको थियो ।