नारायण रिजाल -बागलुङ !   पर्वत र बागलुङलाई सडक सञ्जालबाट नजिक बनाउनका निम्ती कालिगण्डकीमा पक्की पुल निर्माण भएको छ । बागलुङको जैमिनी नगरपालिका–१ जैमिनीधाम देखी पर्वतको फलेवास नगरपालिका –६ देविस्थान जोड्ने पक्की पुल निर्माण कार्य सम्पन्न भएको छ । 

पक्की पुल निर्माण सँगै दक्षिण बागलुङ र पर्वतका सर्वसाधारणलाई आवगमनमा सहज हुनेछ भने प्रदेश राजधानी पोखरा जानका लागि छोटो दुरीको सडक हुने छ । रसुवा,श्री गीता, फेवा जेबी निर्माण कम्पनीले २०७३ असोजमा सम्झौता गरेर ठेक्काको काम अगाडी बढाएको थियो । निर्माण कम्पनीले २०७६ असार मसान्त भित्र काम सक्नुपर्ने भएता पनि कोरोना र विभिन्न कारण देखाउँदै १३ औं संसोधनबाट ठेक्का अवधीको म्याद थप गरेर काम गरेको थियो । पुल निर्माणको काम सम्झौता अवधि भन्दा झण्डै ५ वर्ष ढिला सम्पन्न भएको छ । 

कुल १४ करोड ४२ लाखको लागत रहेको पुलको पुन मुल्याङ्क अर्थात भिओ गरेपछि झण्डै १६ करोडको लागत पुगेको सडक डिभिजन कार्यालय बागलुङका प्रमुख हरि प्रसाद सुवेदीले जानकारी दिए । उक्त पुलको पूर्वतर्फ (पर्वत) खण्डमा सडक जोड्नका लागि पछि थप भएकै रकमबाट ट्याक खोल्ने काम हुने छ । पर्वत तर्फको खण्डमा नयाँ सडक निर्माण गर्नुपर्ने भएको हुँदा भिओ गरेर पुन थप भएको रकमबाट उक्त सडक निर्माण हुने डिभिजन प्रुख सुवेदीले बताए । यस क्षेत्रमा झण्डै ५० मिटर नयाँ सडक बनाउनुपर्ने र उक्त सडक पनि निर्माणको काम धमाधम मै रहेको छ ।
पर्वत खण्डको सडक निर्माणको काम धमाधम
हाल पर्वत खण्डको सडक निर्माणको काम भएको निर्माण कम्पनीका प्रतिनिधि अनिल श्रेष्ठ बताउँछन । श्रेष्ठका अनुसार पुल निर्माणको काम सकिएको र पर्वत खण्डको सडकको केही प्रतिशत काम मात्र बाँकी रहेको छ । उक्त काम फागुन मसान्त सम्म सकाएर सडक डिभिजनलाई हस्तान्तरण गर्ने योजना रहेको छ  । ‘पुल निर्माणको काम सकियो,रंगरोगन मात्रै बाँकी छ, अस्थायी रुपमा जिप भ्यान र साना सवारी साधनहरु आवत जावत गरेका छन । ठुला सवारी साधका लागि सडक निर्माणको काम हुँदै छ निर्माण कम्पनीका प्रतिनिधि श्रेष्ठले भने,–‘पर्वत खण्डको पुल नजिकैको सडक कालिगण्डकी नदिबाट नै उठाउनुपर्ने हुँदा अझै केही समय लाग्ने देखिन्छ हाल नियमित काम गरेका छौं फागुन मसान्तमा सक्ने हाम्रो योजना रहेको छ ।’ उनले फाउण्डेशनको काममा समस्या आएपछि पुलको डिजाईन परिवर्तन गरेका कारण निर्माणमा ढिलाई भएको बताए । 
नदीमा पायल फाउन्डेसनबिना पुलको पिलर ठड्याउन नसकेपछि सडक विभागले पुन डिजाइन परिवर्तन गर्दा पुल निर्माणमा ढिलाई भएको थियो । डिजाइन परिवर्तन गर्नुपर्दा, कोरोना कहर लगायतका समस्याका कारण पनि पटक पटक म्याद थप गर्नुपरेको श्रेष्ठको भनाई छ । 
पुल निर्माण सँगै पोखरा जाने बाटो छोटियो
१ सय मिटर लामो पुल निर्माण सँगै बागलुङको दक्षिण जैमिनी नगरपालिका, बरेङ गाउँपालिका र गुल्मीको कालिगण्डकी गाउँपालिकाका स्थानियलाई पोखरा जानका लागि छोटो दुरी र वैकल्पिक मार्ग भएको छ । जैमिनीधाममा मोटरेबल पुल सम्पन्न भएपछि दक्षिण बागलुङले निकास पाएको जैमिनी नगरपालिकाका उपप्रमुख हरिहर शर्मा बताउँछन । 
‘वर्षायाममा कालिगण्डकी करिडोर ठाउँठाँउमा अवरोध हुँदा सदरमुकाम बागलुङ बजार जान पनि दक्षिण बागलुङका जनताले सास्ती खेप्नुपरेको थियो । नगरउपप्रमुख शर्माले भने,–‘पुल निर्माण सँगै पोखरा पुग्न पनि सहज र छोटो दुरीको बाटो बनेको छ अब पोखरा काठमाण्डौं जाँदा कालिगण्डकी करिडोर हुँदै मालढुंगा पुगेर जानुपर्ने बाध्यता टरेको छ । यसले दक्षिण बागलुङका बासिन्दालाई सहज भएको छ ।’ जैमिनीका बासिन्दालाई पुल बनेपछि प्रदेश राजधानी पोखरा जान झण्डै ३० किमिको सडक छोटिएको  छ । कालिगण्डकी करिडोर सँग जोडिएको उक्त पुलले पर्वत र बागलुङको समृद्धिलाई पनि जोडेको शर्मा बताउँछन ।
जैमिनीधाम देखी पर्वतको फलेवास हुँदै  कार्कीनेटा, स्याङ्जाको पुतलीखेत हुँदै पोखरा जोड्ने यो वैकल्पिक र छोटो मार्ग  छ भने, फलेवास हुँद पर्वतको दोविल्ला निस्केपछि मध्यपहाडी लोकमार्गमा जोडिन्छ । यसका साथै फलेवास हुँदै पर्वतको कुश्माबजार बाट बागलुङ बजार आउने पनि बैकल्पिक मार्गको रुपमा रहेको छ । 
लोकमार्ग र करिडोरको सम्बन्ध छिटो जोडिने
पोखराबाट पर्वतको फलेबास हुँदै बागलुङको जैमिनीघाट र गलकोट जोड्ने रणनीतिक सडक अन्तर्गत कालीगण्डकी पुल तयार भएपछि सर्वसाधारण खुसी भएका हुन । कालीगण्डकी करिडोर र मध्यपहाडी लोकमार्ग जोड्ने मार्गको रुपमा पनि यो पुल कोशेढुंगा बनेको नगरउपप्रमुख शर्मा बताउँछन । उनले पुल बने सँगै गुल्मीको कालिगण्डकी गाउँपालिकाबाट पोखरा आउने यात्रुलाई पनि सहज हुने बताए ।  
पुलको पश्चिम तर्फ राष्ट्रिय गौरवको आयोजना कालिगण्डकी करिडोर जोडिएको छ । कालिगण्डकी करिडोर यस खण्डमा कालोपत्रे भएको छ भने पूर्वतर्फको खण्डमा सडकले निर्माण कार्य भै रहेको छ । झण्डै ३ किमी कच्ची सडक पछि फलेवास नगरपालिकाको देविस्थानमा कालिगण्डकी लोकमार्ग सँग जोडिने छ यस सडक पहिले नै कालेपत्रे भएको छ ।