बागलुङ-  नेपाली काँग्रेस बागलुङले अघिल्ला दुई चरणको निर्वाचनमा निर्वाचित जनप्रतिनिधि सँग अन्तरसंवाद गर्ने भएको छ । गत स्थानिय तहको निर्वाचन र प्रतिनिधि सभा तथा प्रदेश सभाको निर्वाचनमा जिल्लाबाट निर्वाचित जनप्रतिनिधि सँग राजनितिक विषयबस्तु र पार्टीको भावि रणनितिको बारेमा अन्तर संवाद गर्ने निर्णय गरेको हो ।  

शुक्रबार काँग्रेस बागलुङको जिल्ला कार्यसमिति र विभिन्न भातृ एवं सुवेक्षुक संस्थाका प्रमुख एवं प्रतिनिधिहरुको उपस्थितिमा भएको बैठकले पार्टी र जनप्रतिनिधिहरु सँग अन्तर संवाद गरी पार्टीको भावि रणनिति तय गर्ने निर्णय गरेको हो । जनप्रतिनिधि सँग संवाद सँगै पार्टीले जिल्लाका १० वटै स्थानिय तहमा कार्यकर्ता प्रशिक्षण कार्यक्रम संचालन गर्ने निर्णय गरेको काँग्रेस बागलुङ सचिव हरिहर शर्माले जानकारी दिए । निर्वाचन सम्पन्न पश्चात जनप्रतिनिधि सँगै स्थानिय कार्यकर्तालाई पार्टीको पछिल्लो अवस्था र भावि रणनितिका बारेमा प्रशिक्षित गर्ने योजना सहित जिल्ला कार्यसमितिले सो निर्णय गरेको उनले बताए । 
जिल्ला कार्यसमितिको बैठकमा अघिल्ला निर्वाचनका गतिविधिको बारेमा र  जिल्लामा पार्टी संगठनको पछिल्लो अवस्थाको बारेमा सक्षिप्त समिक्षा गरिएको थियो । समिक्षा सँगै तत्लो तहबाट प्राप्त प्रतिवेदनका आधारमा भावि रणनिति तय गर्ने निर्णय गरिएको काँग्रेस बागलुङ सभापति जित शेरचनले जानकारी दिए । बैठकले विपी स्मृति भवन निर्माण कार्यलाई थप गतिशिल बनाउनका निम्ती  आर्थिक संकलन अभियानलाई  थप प्रभावकारी ढंगले अगाडी बढाउने निर्णय गरेको छ । भवन निर्माणका निम्ती जनप्रतिनिधि र विभिन्न पेशामा आवद्ध पेशागत संघसंस्था र शुभचिन्तकलाई अभियानमा जोडिनका निम्ती अपिल समेत गरेको सभापति शेरचनले बताए । ‘काँग्रेसको आफ्नै घर बनाउने अभियानमा साथ दिन देश तथा विदेशमा रहेका सवै शुभचिन्तकहरुमा हामी हार्दिक आग्रह गर्दछौं, सभापति शेरचनले भने–‘हाम्रो कर्तव्य संगठन र घर दुवै बलियो बनाउने हो, यसमा सवैको साथ र सहयोग आवश्यक पर्दछ ।, भवन निर्माणका निम्ती सहयोग गर्ने सवै शुभचिन्तकलाई हामी मुल समितिको सदस्यको रुपमा सम्मान गर्दछौं ।’ उनले भवन निर्माणका निम्ती जग्गा खरिद प्रक्रियाको काम सम्पन्न भएको र केही दिनमा नै शिलन्यास गरी अगाडी बढाईने बताए । 
काँग्रेस बागलुङले आफ्नै भवन निर्माणका निम्ती बागलुङ बजारमा करिब १४ आना जग्गा व्यवस्थापन गरिसकेको छ । जग्गा व्यवस्थापनका निम्ती हाल सम्म झण्डै ७० लाख रुपैयाँ संकलन भएको जनाईएको छ ।