बागलुङ- जिल्लाको बागलुङ नगरपालिकाले लगातार तीन बर्ष सम्म बाँझो रहेको जमिन उपयोगमा ल्याउने कृषकलाई अनुदानका कार्यक्रम संचालन गर्ने भएको छ । नगरपालिकाको १५ औं नगर सभाबाट आगामी आर्थिक वर्ष २०८१।०८२ को बार्षिक निति तथा कार्यक्रम मार्फत बाँझो जमिनको उपयोग, गरौ सवै मिलि सदुपयोग भन्ने नाराका साथ यस्तो निति ल्याएको हो । बाँझो जमिनमा नयाँ प्रकारका उत्पादनमुखी कृषि व्यवसाय संचालनका लागि सहजिकरण गरी नगर प्रमुख स्वरोजगार कार्यक्रममा समावेश गराइने निति तथा कार्यक्रममा उल्लेख गरिएको छ । कृषि, पर्यटन, शिक्षा स्वास्थ्य र पुर्वाधार विकास कार्यक्रमलाई प्राथमिकता दिएर प्रस्तुत गरिएको कार्यक्रममा प्राकृतिक प्रकोप, रोगव्याधि लगायतको कारण कृषिमा गरिएको लगानी डुब्न नदिनको लागि गरांै कृषि उत्पादन हातमा, प्रकोप परे विमा छ साथमा कार्यक्रमलाई अगाडी बढाईएको छ भने एक वस्तु सामूहिक उत्पादन, एक वडा एक विशेष उत्पादन कार्यक्रमलाई पनि प्राथमिकता दिइएको छ । त्यसैगरी कृषि तर्फ नै कृषि पेशालाई पुख्यौली पेशाको रुपमा अगाडि बढाउने उत्कृष्ट कृषक तथा कृषक समूह छनौट गरी घर, फर्म र कार्यस्थलमा नै सम्मान गर्ने गरी गरौ श्रम बारीमा, खाडी होइन कृषिमा भन्ने अभियान अगाडी बढाउने नगरप्रमुख बसन्त कुमार श्रेष्ठले जानकारी दिए  । 
नगरपालिकाले पशुपालनमा किसानहरुलाई आत्मनिर्भर गराउनका निम्ती आज होइन भोलिलाई, पालौ पाडी बाच्छीलाई भन्ने नाराका साथ बाच्छी र पाडी पाल्नको लागि कृषकलाई प्रोत्साहन गर्न कार्यक्रम अगाडी सारेको छ । नगरपालिकाले प्रदेश सरकारको नवप्रर्वतन कार्यक्रम मार्फत सामुदायिक कुकुर सेल्टर हाउसको कार्यक्रमलाई पशु अधिकारकर्मीसंग समन्वय गरी प्रभावकारी कार्यान्वयन गर्ने जनाएको छ । 
पर्यटक सहित म छिट्टै मेरो जन्मस्थान फर्कनेछु 
नगरपालिकाले पर्यटन प्रर्वद्धनका निम्ती म मेरो देशलाई माया गर्छु, म मेरो देशको लागि केही गर्नेछु र ज्ञान, सीप, क्षमता र पर्यटक सहित म छिट्टै मेरो जन्मस्थान फर्कनेछु भन्ने मुल नाराका साथ एक जना बराबर २ जना पर्यटक भित्राउने कार्यक्रम अगाडी ल्याएको छ । त्यसैगरी नगरपालिकालाई पर्यटन विकास सँग जोड्नका निम्ती बजार क्षेत्रभित्र रहेका टोलहरुमा नागरिक साझेदारीमा एक घर एक फूल गमला कार्यक्रमलाई अगाडी सारेको छ भने नगर उप–प्रमुख पर्यटन विकास कार्यक्रमलाई निरन्तरता दिनुका साथै बागलुङ घुम्न जाऔं अभियान संचालन गरिने नगरप्रमुख श्रेष्ठले जानकारी दिए । 
बागलुङ लगानी सम्मेलन गर्ने
नगरपालिकाले निजी क्षेत्रको सहकार्यमा नगर क्षेत्रभित्र ठूला उद्योग, कलकारखाना, पर्यटन, कृषि उद्योग तथा ठूला पूर्वाधार निर्माण लगायतका नगरको समृद्धि र विकासका लागि लगानी जुटाउन विज्ञहरुको सुझावको आधारमा लगानीका क्षेत्रको पहिचान गरी बागलुङ लगानी सम्मेलन आयोजना जनाएको छ ।  बागलुङ नगर क्षेत्रमा जन्मेर स्वेदश तथा विदेशबाट व्यवसाय, उद्यम, ज्ञान, सीप र अनुभव हासिल गरेका नगरवासीहरुलाई आफूले सिकेका ज्ञान, सीप, क्षमता स्थानीय समुदायमा हस्तान्तरण गर्न र बागलुङ नगर क्षेत्रमा लगानी गर्नको लागि आफू जन्मेको माटोलाई माया गरौं अभियान सञ्चालन गरिने बताईएको छ । नगरक्षेत्र भित्र रहेका खानी उत्थानका लागि आवश्यक पहल थालिने निति तथा कार्यक्रममा उल्लेख गरिएको छ । 

ठूला विद्यालय, लिड विद्यालय, आवासीय विद्यालय सञ्चालन गर्न
निति तथा कार्यक्रमा शिक्षा तर्फ अभिभावक सँग नगरप्रमुख कार्यक्रम संचालन गरिने जनाईएको छ ।  प्रदेश सरकारसंगको सहकार्यमा यस नगरपालिकाका विद्यालयहरुमा आवश्यकता अनुसार आवासीय सुविधा सहितका ठूला विद्यालय, लिड विद्यालय, आवासीय विद्यालय सञ्चालन गर्नका लागि पहल गरिने बताईएको छ । नगरक्षेत्रका सामुदायिक विद्यालयमा अध्ययन गर्ने विद्यार्थीहरुको शैक्षिक शुल्क लगायत पढाइ खर्च आफै व्यवस्थापन गर्न सक्ने वातावरण सिर्जना गर्नको लागि कृषि तथा पशुपंक्षीको त्रमा काम गर्ने गरी “पढ्दै कमाउँदै कमाउँदै सिक्दै” कार्यक्रमको सुरुवात संचालन गर्ने नगरप्रमुख श्रेष्ठले बताए । 
स्वस्थ रहन्छिन नारी, स्वास्थ्य संस्थामा डेलिभरी
सामाजिक विकास अन्तरगत नै स्वास्थ्य तर्फ शुन्य होम डेलिभरी भन्ने नारालाई सार्थक बनाउनका लागी स्वस्थ रहन्छिन नारी, स्वास्थ्य संस्थामा डिलिभरी कार्यक्रमलाई निरन्तरता दिएको छ भने स्वास्थ्य विमा कार्यक्रमको प्रभावकारितालाई मध्येनजर गरी स्वास्थ्य विमा कार्यक्रमको दायरा वृद्धि गरी नगर प्रमुख स्वास्थ्य विमा कार्यक्रम लाई थप प्रभावकारिताका साथ अगाडि बढाइएको छ । नगरपालिकाले पोषण, खोप लगायतका कार्यक्रमलाई अझै प्रभावकारी ढंगले संचालन गर्ने जनाईएको छ ।
युवाहरुका लागि लक्षित गरी खेलकुद क्षेत्रको विकासका निम्ती प्रत्येक वडामा एक वडा एक खेल मैदान निर्माणका लागि आवश्यक पहल गरिने निति तथा कार्यक्रममा उल्लेख गरिएको छ ।
पुर्वाधार एम्बुलेन्सको व्यवस्था गर्ने 
नगरपालिकाले  एक वडा एक नमुना पुर्वाधार निर्माण गर्ने निर्माण कार्यलाई निरन्तरता दिँदै नियमित मर्मत सम्भारः दिगो सडकको आधार को मर्म अनुसार प्रत्येक वार्डमा मर्मत सम्भार कोषको व्यवस्था गर्ने छ ।  सडकलाई  दीर्घकालीन रुपमा समस्या समाधानको लागि “पूर्वाधार एम्वुलेन्स”को व्यवस्था गर्न साझेदारहरुको खोजी गरिने निति तथा कार्यक्रममा उल्लेख गरिएको छ ।  बागलुङमा निर्माण भएको बसपार्क संचालन गर्नुका साथै वडा नं। १४ को नारायणस्थानमा एकिकृत बस्ती विस्तारका लागि डिपिआर तयार पारिने भएको छ । शुद्ध खानेपानीको सेवा नपुगेका सवै वडा र बस्तीहरुमा शुद्ध खानेपानीको सुविधा पु¥याउन संघ, प्रदेश र अन्य सरोकारवालाहरुसंगको सहकार्यमा “एक घर एक धारा” कार्यक्रमलाई प्रभावकारी कार्यान्वयनको व्यवस्था गरिनेछ । थाउने बगर देखि रोकापाला मुसुरावारी पहरे मुलावारी लिफ्टिङ खानेपानी योजनाको सम्भाव्यता अध्ययन गरिने निति तथा कार्यक्रममा उल्लेख गरिएको छ । 
हाम्रो आफ्नै गाउँघर, सुविधा सम्पन्न नगर
नगरपालिकाको सेवा प्रवाहलाई सरल, सहज, जवाफदेही, जनमुखी, सेवाग्राहीमैत्री बनाउन कार्यालयको भौतिक पूर्वाधार र सेवा प्रवाह प्रणालीलाई थप व्यवस्थित गर्ने जनाएको छ । नगरपालिकाको भू–उपयोग नीति तयार गरिनेछ । “हाम्रो आफ्नै गाउँघर, सुविधा सम्पन्न नगर” भन्ने नाराका साथ बागलुङ नगरपालिकाको वडा नंं १४ को नारायणस्थान, वडा नंं १२ को उपल्लो सरङ्गी र तल्लो सरङ्गी तथा वडा नंं १३ को पैयँुपाटाको दम्क देखि नारायणस्थानसम्मको तल्लो भागलाई समेटी सहरी विकास मापदण्ड अनुसार व्यवस्थित सहरको रुपमा विकास गरिने बताईएको छ । 
परम्परागत चौतारीको संरक्षण
परम्परागत गोलघर र शताव्दी पूरा गरेका घरहरुलाई मौलिक रुपमा मर्मत सम्भार गरी ऐतिहासिक सम्पदाको रुपमा अभिलेख राखी संरक्षण गर्न चाहने धनीहरुलाई सहयोग उपलब्ध गराइने निति तथा कार्यक्रममा उल्लेख गरिएको छ । नगरक्षेत्र भित्र रहेका वर, पिपल, स्वामी लगायतका वृक्षहरु र चौतारीको परम्परागत शैली झल्कने गरी  संरक्षण र संवद्र्धन गरिने नगरप्रमुख श्रेष्ठले बताए । नगरका सडक आसपास रुख रोप्ने कार्यलाई प्रोत्साहन गरी ग्रिन रोडको अवधारणालाई कार्यान्वयन गरिने बताईएको छ । 
बुबा आमा संग नगरप्रमुख कार्यक्रम सञ्चालन
नगरपालिको जेष्ठ नागरिकका लागि लक्षित गरी ६५ वर्ष उमेर पूरा भएका तर हेरचाह गर्ने व्यक्ति कोही नभएका र राज्यबाट तथा अन्य मुलुकबाट नियमित सुविधा प्राप्त नगरेका नितान्त बेसहारा र आयस्रोत नभएका व्यक्तिहरुको संरक्षकत्व ग्रहण गर्दै बुबा आमा संग नगरप्रमुख कार्यक्रम सञ्चालन गर्ने जनाएको छ । त्यसैगरी ज्येष्ठ नागरिक हाम्रा गौरव कार्यक्रमको सुरुवात गरी जेष्ठ नागरिकहरुलाई  उत्कृष्ट पालन पोषण तथा स्याहार गर्ने कुशल छोरा र बुहारीलाई सम्मान गर्ने परिपाटीको सुरुवात गर्ने बताईएको छ । व्यवसाय कर, घर वहाल कर लगायतका कर सङ्कलन र व्यवसाय दर्ताको लागि घरदैलो कार्यक्रम सघन रुपमा सञ्चालन गरिने निति तथा कार्यक्रममा उल्लेख गरिएको छ । निति तथा कार्यक्रममा आईतबार नै छलफल भएको छ भने सोमबार नगरपालिकाको आगामी आर्थिक वर्षको बार्षिक बजेट ल्याउने कार्यक्रम रहेको नगरपालिकाले जनाएको छ ।