बागलुङ-  जिल्लाको काठेखोला गाउँपालिकाले आगामी आर्थिक वर्ष २०८१।०८२ का लागि कुल ५८ करोड ७७ लाख २३ हजार रुपैयाँ बजेट सार्वजनिक गरेको छ । गाउँपालिकाको १५औं गाउ सभाबाट गाउँपालिका उपाध्यक्ष तेज बहादुर थापा ‘तिलक अगामी आर्थिक वर्षको बजेट सार्वजनिक गरेका हुन । गाउँपालिकाको चालु तर्फ ३८ करोड २० लाख २० हजार र पूँजीगत तर्फ २० करोड ५७ लाख ३ हजार रुपैयाँ बजेट विनियोजन गरिएको छ ।

गाउँपालिकाले आर्थिक विकास तर्फ १ करोड ४० लाख, पूर्वाधार विकास तर्फ ८ करोड ९ लाख ३ हजार, सामाजिक विकास तर्फ ३ करोड ४० लाख, सार्वजनिक सेवा तथा क्षमता विकास तर्फ ४० लाख र वनवातावरण तथा विपद व्यवस्थापन तर्फ ४० लाख रुपैयाँ बिनियोजन गरेको छ । संघीय सरकारबाट वित्तिय समानिकरण अनुदान ९ करोड ९९ लाख रुपैयाँ, संघीय सरकारको ससर्त अनुदान ३० करोड १८ लाख रुपैयाँ, विशेष अनुदान २ करोेड, संघीय समपुरक अनुदान १ करोड, संघीय सरकार राजश्व बाँडफाड ९ करोड ३ लाख रुपैयाँ, गण्डकी प्रदेश सरकार वित्तिय समानिकरण अनुदान १ करोड २९ लाख ६९ हजार रुपैयाँ, गण्डकी प्रदेश सरकार राजश्व बाँडफाँड अनुदान ६५ लाख ७७ हजार रुपैयाँ, गाउँपालिकाको आन्तरिक आय ७७ लाख रुपैयाँ, गण्डकी प्रदेश विशेष तथा समपुरक अनुदान १ करोड रुपैयाँ, संचित कोष २ करोड ७९ लाख रुपैयाँ र अन्य आम्दानी ५ लाख रुपैयाँ अनुमान गरी ५८ करोड ७७ लाखको बजेट सार्वजनिक गरेको छ ।

गाउँपालिकाले कृषि तर्फ किसानलाई उत्पादन सँगै बजारसँग जोड्दै सबै जाति, समुदायहरुले उत्पादन गरेको दुध बजारीकरण गर्न दुध संकलन केन्द्रको पूर्वाधार निर्माण गर्नका निम्ती आवश्यक बजेट व्यवस्थापन गरेको उपाध्यक्ष थापाले जानकारी दिए । जसका लागि १० लाख रुपैयाँ बजेट बिनियोजन गरिएको छ । पालिकाले स्थानीय गोरु संरक्षणको लागि ५ लाख रुपैयाँ बिनियोजन गरेको छ । त्यस्तै कृषि क्षेत्र अन्तरगत नै विभिन्न पकेट क्षेत्र विकास तथा विस्तारको लागि ९ लाख रुपैयाँ बिनियोजन गरिएको छ । गाउँपालिकाले कोदो बाली उत्पादनमा आधारित अनुदान कार्यक्रमको लागि ५ लाख रुपैयाँ बिनियोजन गरेको उपाध्यक्ष थापाले जानकारी दिए । गाउँपालिकाले महिला उद्यमशिलता विकास कार्यक्रमको लागि ७ लाख, प्रत्येक वडाको उच्च ठाउँहरुमा रहने गरि बहुउपयोग पोखरी निर्माणको लागि ५ लाख रुपैयाँ बिनियोजन गरिएको छ । गाउँपालिका अध्यक्ष राजु थापाले निति तथा कार्यक्रम मार्फत प्राथमिकतामा राखेको दलित समुदायको निशुल्क स्वास्थ्य बिमा गर्ने कार्यक्रमलाई प्राथमिकता दिएको छ ।

दलित समुदायका नागरिकहरुलाई स्वास्थ्यमा पहुँच पु¥याउने उद्धेश्यले ‘अध्यक्षसँग दलित नागरिक स्वास्थ्य बिमा कार्यक्रमका लागि ७ लाख रुपैयाँ बजेट विनियोजन गरिएको छ । उक्त कार्यक्रम मार्फत गाउँपालिका भित्रका एक हजार दलित घर परिवार लाभान्वित हुने गाउँपालिका अध्यक्ष राजु थापा बताउँछन । गाउँपालिका भित्र उत्पादन हुने सिन्की, भाँगो, हँसिया, कोदाली, हस्तकलाका सामाग्रीका साथै नाङ्लो, डाली, मकैको भुत्लाबाट निर्माण हुने फूलजन्य सामाग्रीहरु संकलन गरि बजारीकरण गर्ने उद्धेश्यले काठेखोला कोशेली घर सञ्चालन निम्ती आवश्यक बजेटको व्यवस्था गरेको छ ।