बागलुङ- उद्योगी व्यवसायीको साझा संस्था बागलुङ उद्योग बाणिज्य सङ्घको ६१ औं बार्षिक साधारण सभा तथा १९ औं अधिवेशन आगामी चैत्र १५ र १६ गतेका लागि तय गरिएको छ । सङ्घको कार्यसमितिको बैठकले १५ गते साधारण सभा र १६ गते अधिवेशनको मिति निर्धारण गरेको हो । 
२०२० सालमा स्थानमा भएको संङ्घले ६० औं बसन्त पार गरी यस वर्ष हिरक वर्षका रुपमा मनाएको छ ।  बागलुङ जिल्लाकै पहिलो संस्थाको रुपमा संघ स्थापना भएको थियो । अधिवेशनका लागि सङ्घले आईतबार निर्वाचन कार्यतालिका समेत सार्वजनिक गरिएकाे सघका अध्यक्ष नरेश कंडेलले जानकारी दिए । 
निर्वाचन कार्यतलिका अनुसार चैत्र १० गते मतदाता नामावली प्रकाशन हुने छ भने सोही दिन मतदाता नामावली उपर दाबी विरोध र अन्तिम मतदाता नामावली प्रकाशनको समय रहेको छ । त्यसैगरी चैत्र ११ गते उम्मेदवारी दर्ता र उम्मेदवारी उपर दाबी विरोधको समय निर्धाण गरिएको छ । सङ्घले चैत्र १२ गतेका लागि उम्मेदवारी फिर्ता एवं समन्वय र सोही दिन उम्मेदवारीको अन्तिम नामावली प्रकाशनको कार्यतालिका निर्धारण गरेको छ । त्यसैगरी चैत्र १३ र १४ गते मतदाता भेटघाट कार्यक्रम रहेको छ भने १५ गतेका साधारण सभा तोकेको छ । संघको चैत्र १६ गते शनिबार मतदानका लागि समय निर्धाण गरिएको अध्यक्ष कंडेलले जानकारी दिए । कंडेलका अनुसार यो कार्यतालिका निर्वाचन समितिले आवश्यकता अनुसार केही फेर बदल पनि गर्न सक्नेछ । 
संघमा हाल कुल १ हजार ४२० उद्योगी व्यवसायी सदस्य रहेका छन । सदस्यहरुले  १ जना अध्यक्ष, विषयगतमा महिला उद्यमी तर्फ ३ सदस्य, उद्योग तर्फ २ सदस्य वस्तुगत तर्फ १ र खुल्ला तर्फ १४ सदस्य गरी कुल २१ जनालाई मतदान गर्न पाउने छन ।  संघमा निर्वाचित अध्यक्षले ४ जना मनोनित गरी कुल २५ सदस्यीय कार्यसमिति गठन महासचिव ऋषिराम गाैतमले जानकारी दिए  । संघमा पदाधिकारीहरू निर्वाचित सदस्यबाट नै चयन हुनेछन ।   संघको १८ औं अधिवेशनबाट अध्यक्षमा नरेश कंडेल सहित सवै सदस्यहरू सर्वसम्मत निर्वाचित भएका थिए । यस पटक पनि सवै पक्षलाई मिलाएर सर्वसम्मतको प्रयास गरिएको छ ।