बागलुङ, । गुठी युनाइटेड बागलुङमा जारी तेस्रो जेसीज कपको सेमिफाइनलमा प्रवेश गरेको छ । बुधबार भएको खेलमा गुठीले म्याग्दी जिल्ला फुटबल संघलाई ३–० गोलअन्तरले पराजित गर्दै अन्तिम चारमा स्थान पक्का गर्यो । 
खेलको १५ औं मिनेटमा मनिष श्रेष्ठले गोल गर्दै गुठीलाई अग्रता दिलाए । गुठीको लागि खेलको २८ औं मिनेटमा मनिष ठकुरीले गोल गर्दै अग्रतालाई दोब्बर पारे । 
मनिष ठुकरीले खेलको ६७ औं मिनेटमा टिमको लागि तेस्रो र आफ्नो दोस्रो गोल गर्दै गुठीलाई अन्तिम चारमा स्थान पक्का गराए । यस्तै बुधबार नै भएको दोस्रो खेलमा विभागीय टिम जिल्ला प्रहरी कार्यालय बागलुङले विजयी सुरुवात गरेको छ । प्रहरीले अमर आदर्श स्पोर्टसलाई १–० गोलअन्तरले पराजित गर्यो ।
प्रहरीका सन्दिप तामाङले गरेको गोल नै जितमा निर्णायक बन्यो । खेलको ६९ औं मिनेटका तामाङले प्रहार गरेको कर्नर किक नै जितका लागि पर्याप्त भयो ।
बागलुङ जेसीजको आयोजनामा जारी प्रतियोगितामा बिहिवार दुइ खेल हुने अध्यक्ष सुशान्तकृष्ण श्रेष्ठले बताए । बुधबार पहिलो खेल बलेवा एफसी र श्रीमेहर गण विच हुनेछभने दोस्रो खेल जिल्ला प्रहरी कार्यालय बागलुङ र बागलुङ सुधार केन्द्र बिच हुने अध्यक्ष श्रेष्ठले बताए ।
२४ गतेसम्म संचालन हुने प्रतियोगिताको विजेताले नगद २ लाख र उपविजेताले १ लाख रुपैयाँ सहित ट्रफी, मेडल र प्रमाणपत्र प्राप्त गर्ने जेसीज बागलुङका अध्यक्ष श्रेष्ठले बताए। यस्तै प्रतियोगिताको सेमिफाइनल पुग्ने टिमले नगद १५ हजार रुपैयाँ प्राप्त गर्नेछन्भने अनुशासित टिमले ५ हजार रुपैयाँ प्राप्त गर्नेछ । यस्तै विधागत तर्फ प्रतियोगिताको सर्वोकृष्ट खेलाडी, उत्कृष्ट फरवार्ड, उत्कृष्ट मिडफिल्डर, उत्कृष्ट डिफेन्डर, उत्कृष्ट गोलरक्षकले नगद ५–५ हजार रुपैयाँ र ट्रफी प्राप्त गर्नेछन्भने प्लेयर अफदी म्याच हुने खेलाडीले १ हजार रुपैयाँ प्राप्त गर्ने जनाइएको छ ।