बागलुङ  - जिल्लाको जैमिनी नगरपालिका जैमिनीको छोरी कार्यक्रम संचालन गर्ने भएको छ । छोरी जन्मे घर खुसीको लहर भन्ने मुल नाराका लागि सो कार्यक्रम संचालन गर्ने भएको हो । नगरपालिकाले आगामी आर्थिक वर्ष २०८१।०८१ को निति तथा कार्यक्रम प्रस्तुत गर्दै नगरप्रमुख नरबहादुर पुनले  छोरीको पहिचान सँगै गैह कानुनी रुपमा हुने भ्रण हत्या रोक्न र छोरी माथी हुने सामाजिक असमानता अन्तय गर्न सहयोग पुग्ने विश्वासका साथ जैमिनीको छोरी कार्यक्र अगाडी ल्याएको बताएका छन । नगरपालिकाले  कृषिमा बाँझो जग्गाको उपयोग र शिक्षामा प्राविधिक विषयलाई प्राथमिकतामा राखेर आगामी आर्थिक वर्षको नीति तथा कार्यक्रम सार्वजनिक गरेको छ ।

बाँझो जग्गाको उपयोगका लागि कृषि मजदुरको परिचालन र भुमी बैंक स्थापनाको अवधारण नगरले सार्वजनिक गरेको हो ।  कृषि, स्वास्थ्य र शिक्षालाई प्राथमिकता दिने नीति लिएको जैमिनीले पकेट क्षेत्रको विस्तारमा जोड दिएको छ । आइतबार नीति तथा कार्यक्रम प्रस्तुत गर्दै नगर प्रमुख पुनले जैमिनी नगरपालिका–१ कुश्मीशेरामा केराको पकेट क्षेत्र विस्तार गर्ने भन्दै ‘सेरा जाउँ केरा खाउँ’ अभियान सञ्चालन गर्ने घोषणा गरे । वडा नं २ र ३ दमेकलाई तरकारीको पकेट क्षेत्रका रुपमा विकास गरेर तरकारीमा आत्मनिर्भर बन्दै निर्यातको नीति लिएको उनले बताए । नगरपालिकाले व्यवसायीक राँगो पाल्ने किसानलाई अनुदान दिने कार्यक्रम अगाडी बढाएको छ । 
‘गुणस्तरीय शिक्षाको आधारशिला, सुधारिएको पाठशाला’ नारासहित शिक्षण सिकाईलाई गुणस्तरीय बनाउन विद्यालयदेखि अभिभावकसम्मको मुल्यांकन गरेर न्युनतम सेवा मापदण्ड लागु गर्ने नीति नगरले बनाएको छ ।
एक वडा एक आवासीय विद्यालय, एक विद्यालय एक करेसाबारी कार्यक्रम सञ्चालन गरेर हरित विद्यालय अभियान सञ्चालन गरिने नगर प्रमुख पुनले घोषणा गरे । विदेशमा सीप सिकेकाहरुको सीप परीक्षण गरेर प्रमाणपत्र वितरण गर्न प्रदेश सरकारसँग समन्वय गर्ने नीति समेत जैमिनीले सार्वजनिक गरेको छ । त्यसै गरी परम्परागत असल अभ्यउास र ज्ञानको हस्तान्तरण गर्न जैमिनी संस्कार शिक्षा कार्यक्रम लागु गरिने निति ल्याएको छ । ‘अवसर र सम्भावनाको खानी, गरौं जैमिनीमा लगानी’ भन्ने नाराका साथ लगानी सम्मेलन गर्ने, बाँदर बगैंचाका काम अघि बढाउने र जैमिनी धाम विकास समितिको गठन गर्ने जस्ता महत्वकांक्षी योजनाहरु नीति तथा कार्यक्रममा समावेश गरिएको छ ।
सहकारीको प्रवद्र्धन, पर्यटनको पहिचान र पूर्वाधारमा विकास, वडा कार्यालयसम्म पिच बाटो पुर्याउने, घरदैलो स्वास्थ्य सेवाको विस्तार, वडा कार्यालयबाट सबै खालको सेवा दिने, जेष्ठ नागरिक, एकल महिला, दलित, अल्पसंख्यक, विपन्न वर्ग र समुदायको हितमा सामाजिक कल्याणको कार्यक्रम सञ्चालन गर्ने नीति तथा कार्यक्रममा उल्लेख छ । नगरपालिकाले घरबार विहिनलाई घर र फुसका छाना विस्थापन कार्यक्रमलाई निरन्तरता दिएको छ भने भुमि बैंको स्थापना र सम्भाव्यता अध्ययन गरिने जनाईएको छ ।