बागलुङ–  नेपाल पत्रकार महासघं, बागलुङ शाखाले आफ्ना सदस्यसहित जिल्लाभर क्रियाशील पत्रकार र सञ्चारकर्मीको दुर्घटना बीमा गरेको छ । प्रतिव्यक्ति दुई लाख रुपैयाँ प्रिमियम प्राप्त गर्ने गरी जिल्लाका ९९ जना पत्रकारहरुको दुर्घटना बीमा गरिएको छ । बीमाका लागि बागलुङ नगरपालिका, २ नं. वडा कार्यालय आर्थिक सहयोग गरेको छ भने नेको बीमा कम्पनीसँग सहकार्य गरिएको नेपाल पत्रकार महासघं बागलुङका अध्यक्ष राम थापा ‘अविरल’ले जानकारी दिए । कार्यस्थलमा खटिने पत्रकार÷सञ्चारकर्मी र सञ्चारमाध्यमका कर्मचारीहरुको दुर्घटना बीमा गरिएको थापाले बताए । बागलुङ नगरपालिका–२ का वडाध्यक्ष सुरज बोसेलले कार्यस्थलमा खटिने पत्रकारको सम्भावित जोखिमलाई दृष्टिगत गरी वडा कार्यालयले बीमा कार्यक्रममा सहयोग गरेको बताए । उनले आगामी वर्षहरूमा पनि पत्रकारहरूको दुर्घटना बीमाका लागि वडाले सहयोग गर्ने प्रतिबद्धता व्यक्त गरेका छन । “रातदिन नभनी फिल्डमा खटिएका पत्रकारहरुको जोखिम कम गर्ने र केही भएमा तत्काल उपचार गराउन सकिने गरी बीमा गरिएको हो”, वडाध्यक्ष बोसेलले भने, “यसबाट अन्यत्रका जनप्रतिनिधि, स्थानीय सरकारसमेतले आम नागरिक र पेशागत क्षेत्रका व्यक्तिको स्वास्थ्य र सुरक्षामा ध्यान दिन सन्देश जानेछ” उनले यो प्रक्रियालाई निरन्तरता दिने बताएका छन । पहिलो चरणमा दुई वर्षका लागि उक्त बीमा गरिएको हो । आइतबार महासघंका अध्यक्ष थापा, वडाध्यक्ष, बोसेल र नेको बीमा कम्पनीका शाखा प्रबन्धक अन्जिला श्रेष्ठले पत्रकारलाई बीमा ‘पोलिसी’ हस्तान्तरण गरेर बीमा कार्यक्रमको थालनी गरिएको थियो । श्रेष्ठले पत्रकारको बीमाले आम नागरिकलाई पनि सचेत बनाउने बताईन । गत मङ्सिर २८ गतेको अधिवेशनबाट निर्वाचित महासघं कार्यसमितिको बैठकले पत्रकारको दुर्घटना बीमा गर्ने निर्णय गरेको थियो । महासघका सचिव नारायण रिजालले पत्रकारहरूको पारिवारिक स्वास्थ्य बीमाका लागि पनि पहल भइरहेको बताए । “पत्रकारहरूको पेशागत हकहित र व्यावसायिक सुरक्षामा महासघं प्रतिबद्ध छ”, उनले भने, “विषयगत तालिम लगायत पत्रकारको दक्षता अभिवृद्धिका कार्यक्रममा हामी केन्द्रित छौँ ।” महासंघले पत्रकारहरुका लागि लक्षित गरी लेखनबृत्ति कोष पनि संचालन गरेको छ । कोषमा हाल सम्म ४ लाख रुपैयाँ बढि संकलन भएको छ ।