जिल्लाको जैमिनी नगरपालिकाले गत आर्थिक वर्षमा कोभिड व्यवस्थापनका लागि ७१ लाख ९४ हजार ६ सय ४४ रुपैया खर्च गरेको छ । कुल ७२ लाख रुपैयाँ बजेट व्यवस्थापन गरेको नगरपालिकाले सोही रकम खर्च गरेको आफ्नो वार्षिक समीक्षा मार्फत जानकारी दिएको छ । 
बार्षिक समिक्षामा  नगरपालिका अन्तर्गतका शाखाका शाखा प्रमुखहरुले गत आर्थिक वर्षमा सम्पन्न गरेका खर्च र प्रगती विवरणको बारेमा जानकारी गराएका थिए । नगरपालिका भित्रका स्वास्थ्य संस्थाले गत आर्थिक वर्षमा ३५ हजार ४ सय ४७ जनालाई सेवा प्रवाह गरेको नगरपालिकाका जनस्वास्थ्य निरिक्षक गोविन्द प्रसाद शर्माले जानकारी दिए । नगरपालिका भित्र १० बेडको अस्थायी कोभिड अस्पताल सञ्चालन गरेको शाखाले गत आर्थिक वर्षमा ५०२ जनाको पिसिआर र १४५ एन्टिजिन परीक्षण गरिएकोमा २६४ जनामा पोजेटिभ देखिएको भएता पनि मृत्यु नभएको उनले जानकारी दिए । स्वास्थ्य शाखाले सञ्चालन गरेको विभिन्न क्रियाकलापका लागि विनियोजित बजेट रु.५ करोड ५६ लाख १४ हजार मध्ये ५ करोड १३ लाख ८ हजार ८४० खर्च गरिएको छ । त्यसैगरी  गरी आयुर्वेद अन्तर्गत विभिन्न क्रियाकलापहरु सञ्चालन गरिएको आयुर्वेद शाखाका शाखा प्रमुख डा. लक्ष्मी प्रसाद शर्माले जानकारी गराए । सो शाखाले गत आर्थिक वर्षमा ३३६ के.जि. विभिन्न आयुर्वेदिक औषधी निर्माण गरेको थियो । शाखाले विनियोजित बजेट रु.६७ लाख मध्ये ६६ लाख ५० हजार ८८६ खर्च गरेको बताईएको थियो ।

कार्यक्रममा नगरपालिकाका शिक्षा शाखाका प्रमुख उपसचिव खेम प्रसाद आचार्यले शिक्षाका क्षेत्रमा गरिएका क्रियाकलापहरुको बारेमा प्रस्तुत गरेका थिए । शाखाले शिक्षाका क्षेत्रमा विनियोजन गरिएको सशर्त बजेट रु.६ करोड ४१ लाख २८ हजार मध्ये रु.६ करोड १६ लाख ३७ हजार ८३६ अर्थात ९८.१२ प्रतिशत खर्च गरेको छ । सो बजेट शिक्षक तथा प्रारम्भिक बालविकास सहजकर्ताको तलब भत्ता दिवा खाजा विद्यालयको भौतिक पूर्वाधार निर्माण तथा मर्मतका साथै व्यवस्थापन लगायतका क्रियाकलापमा खर्च गरिएको उनले बताए ।  बित्तीय सामान्नीकरण अन्तर्गत स्थानीय पाठ्यक्रम निर्माण प्रधानाध्यापकहरुको बैठक प्राविधिक धार तर्फका विद्यार्थीका लागि छात्रवृत्ति लगायतका क्रियाकलाप सञ्चालनमा विनियोजित बजेट रु.३५ लाख मध्ये रु.२४ लाख ९० हजार २६ रुपैया अर्थात ७१.१४ प्रतिशत खर्च भएको जानकारी गराए ।
नगर प्रमुख कृषि परियोजना माटो परीक्षण मागमा आधारित फलफूलका विरुवा वितरण प्रविधि हस्तान्तरण कृषि सम्बन्धी तालिम लगायतका क्रियाकलाप कृषि शाखाले सञ्चालन गरेको कृषि शाखा प्रमुख नेत्र प्रसाद शर्माले जानकारी गराए । कृषि तथा पशुपंक्षिको तथ्याङ्क संकलन, बहुउद्देशीय नर्सरी स्थापना, मकै प्रवर्धन कार्यक्रम लगायतका सशर्तका कार्यक्रम सञ्चालन गरिएको उनले बताए । ति क्रियाकलापहरु सञ्चालनका लागि विनियोजित बजेट रु.१ करोड ३२ लाख ३७ हजार मध्ये रु.९७ लाख ७७ हजार ४२५ खर्च भएको विवरण प्रस्तुत गरिएको थियो ।
पशु सम्बन्धी औषधी खरिद प्रविधि हस्तान्तरण खोर तथा गोठ सुधार भैँसी प्रवर्धन कार्यक्रम तालिम लगायतका क्रियाकलाप सञ्चालन गरेको पशु शाखाले रु.१ करोड ११ लाख ७० हजार मध्ये जम्मा रु.९१ लाख ५ हजार ४६६ रुपैयाँ खर्च भएको शाखा प्रमुख कृष्ण ढकालले जानकारी गराए ।
विपदका कारण क्षति पुगेका १६३ जनालाई राहत उपलब्ध गराइनुका साथै मनसुनजन्य विपदबाट आवास नष्ट भएको १ जनाको आवास पुननिर्माण गरिएको । विपदका कारण क्षति पुगेका विभिन्न ५९ वटा भौतिक संरचना मर्मतका लागि राहत वितरण गरिएको विपद शाखा प्रमुख रेशम चापागाईले बताए । 
सामाजिक विकास शाखाले गत आर्थिक वर्षमा ६२ जनालाई विभिन्न श्रेणीका परिचयपत्र वितरण गरेको शाखाका प्रमुख देवि विकले जानकारी गराए । ९९० खरका छाना मध्ये ४१७ घरधुरीलाई जस्तापाता उपलब्ध गराउनुका साथै १०३ जना घरविहिन मध्ये २० जनाले घर बनाइसकेको समेत जानकारी गराए ।  २२ सुकुम्वासी घरपरिवार मध्ये १३ घरपरिवारले घर निर्माण गरिसकेको र २ घरपरिवारले घर निर्माण गरिरहेको उनले बताए । सुरक्षित नागरिक आवासमा समावेश २२० मध्ये ५२ घरधुरीले आवास निर्माण गरिसकेका छन भने १० घरधुरीले निर्माण कार्य गरिरहेको बताइएको थियो । साथै गरिवी निवारणका लागि लघुउद्यम विकास कार्यक्रम अन्तर्गत सञ्चालन गरिएका क्रियाकलापहरुको बारेमा जानकारी गराइएको थियो ।

सामाजिक सुरक्षा अन्तर्गत सामाजिक सुरक्षा भत्ता वापत तीन चौमासिकमा जम्मा रु १२ करोड ६३ लखा ९४ हजार ३१८ वितरण गरिएको सामाजिक सुरक्षाका फोकल पर्सन हेमराज थापाले जानकारी गराए । यस नगरपालिकाको १० वटा वडा मध्ये ८ वडामा बैङ्क मार्फत भत्ता भुक्तानी हुने गरेको थापाले बताए ।  गत आर्थिक वर्षमा २३ किलोमिटर नयाँ सडक निर्माण भएसँगै ९४७ मिटर पक्कि नालि निर्माण भएको विवरण इन्जिनियर विवेक सापकोटाले प्रस्तुत गरे ।
१२०० मिटर कालोपत्रे गरिएको छ भने ३४८ मिटर ढलान गरिएको छ । सिँचाईका लागि १२८२ मिटर पक्कि नालि निर्माण गरिनुका साथै ८ वटा पोखरी २ वटा झोलुङ्गे पुल ११ वटा धारा जडान गरिएको छ साथै ९ वटा शौचालय निर्माण गरिएको विवरण प्रस्तुत गरिएको थियो ।
प्रधानमन्त्री रोजगार कार्यक्रम अन्तर्गत ३९६ जनाले २४ वटा योजनामा २४ हजार ३१४ दिन बराबरको काम गरेको विवरण रोजगार संयोजक सुरेश पुनले प्रस्तुत गरे । यस अवधिमा सिँचाई कुलो मर्मत तथा निर्माण २ वटा, मोटरबाटो मर्मत मर्मत सम्भार ८ वटा र पदमार्ग (गोरेटोबाटो) मर्मत सम्भारका १४ वटा योजना सञ्चालन गरिएकोमा १ करोड २५ लाख ७० हजार ३३८रुपैया पारिश्रमिक वापत भुक्तानी भएको जानकारी गराए ।  गत आर्थिक वर्षमा ४६० वटा योजनाहरु सम्पन्न भएको योजना शाखा प्रमुख प्रेम सापकोटाले बताए । ३५३ योजना पूर्णरुपमा सम्पन्न भएका छन भने ६४ वटा योजनाको ७० प्रतिशत ३३ वटा योजना कार्यान्वन हुन नसकेको सापकोटाले जानकारी गराए । समग्रमा भौतिक प्रगति ८३ र वित्तिय प्रगति ८० प्रतिशत रहेको उनले बताए ।
 ३६ करोड ८५ लाख ६९ हजार १०८ चालु खर्च भएकोमा २१ करोड ४६ लाख ८६ हजार ३७१ पूूँजीगत गरी जम्मा ५८ करोड ३२ लाख ५५ हजार ४७९ रुपैया खर्च भएको लेखा अधिकृत सुर्य बिकले जानकारी गराए भने ९२ लाख २१ हजार ८०५ आन्तरिक आय भएको जानकारी गराइएको थियो ।  शाखागत रुपमा गत आ.व.को प्रगति प्रस्तुती गरिएको थियो । प्रस्तुतिका क्रममा कार्यान्वयका क्रममा भोग्नुपरेको कठिनाईका बारेमा समेत जानकारी गराइएको थियो । सहभागिहरुले अनुगमनको पक्षलाई लिएर जिज्ञासा राखेका थिए भने सल्लाह सुझाव समेत दिएका थिए ।
कार्यक्रममा नगरप्रमुख इन्द्रराज पौडेलले गत वर्ष नगरभित्र उल्लेखनिय प्रगति भएको र अगामी दिनमा पनि अझै राम्रा काम हुने बताए । उनले जैमिनी नगर क्षेत्र भित्रका आम नागरिकको सेवामा नगरपालिकाले सधै साथ दिएको बताए ।