बागलुङ - बागलुङ नगरपालिका–१० दव्ल्याङमा पहिरो खस्दा कालिगण्डकी करिडोर र मालढुंगा कुश्मिसेरा  (एडिबी)  सडक (एडिबी) अवरुद्ध भएको छ । बिहीबार रातिदेखिको अविरल वर्षापछि आएको पहिरोका कारण दव्ल्याङमा सडक बगाएको हो।

सामान्य वर्षामा समेत उक्त सडक अवरुद्ध हुने गरेको छ। करिडोर अवरुद्ध हुँदा बागलुङ सदरमुकाम बागलुङ बजारबाट जिल्लाको दक्षिणी क्षेत्रमा सवारी आवागमन ठप्प भएको प्रहरी सहायक निरीक्षक गंगाराम विकले बताए। करिडोर हुँदै लामो दूरीका लागि छुटेका सवारीसाधन समेत बाटोमै अलपत्र अवस्थामा रहेका छन ।  दब्लाङको पहिरोले बलेवाको माथिल्लो भेग पैयुँपाटा, भकुण्डे भैरवस्थान जाने सडक पनि अवरुद्ध भएको छ । 

कालोपत्र गर्ने काम चलिरहेको बागलुङ–बलेवा विमानस्थल खण्डमा ठाउँठाउँमा पहिरोले करिडोर भत्काएको छ । कालोपत्रको काम गरिरहेको निर्माण कम्पनीले पहिरो पन्छाउने र पहिरोले बगाएका संरचना पुनर्निर्माणको काम गरिरहेको भए पनि सडक खुल्न केही समय लाग्ने प्रहरी सहायक निरीक्षक विकले बताए।