बागलुङ - नेपाल शिक्षक संघका अध्यक्ष लक्ष्मी किशोर सुवेदीले शिक्षकहरुको अहिलेको आन्दोलन शिक्षा ऐन ल्याउनका लागि केन्द्रीत गरिएको बताएका छन । नेपाल शिक्षक संघ बागलुङको ४३ औं प्रतिनिधिसभामा तथा शिक्षक सम्मान कार्यक्रम उद्घाटन कार्यक्रममा बोल्दै सुवेदीले संसदको चालु हिउँदे अधिवेसनबाट बिद्यालय शिक्षा ऐन जारी गराउन दवाव दिने बताए । उनले महासंघले देशव्यापी रुपमा घोषणा गरेको आन्दोलनको प्रतिफल विद्यालय शिक्षा ऐन जारी गर्ने बताए ।  महासंघले सबै पेशागत शिक्षक संगठनमा लागेका एकलाखबढी शिक्षकलाई फागुन २० गते काठमाण्डौ उतार्ने तयारी गरेको शिक्षक महासंघका अध्यक्ष समेत रहेका सुवेदीको उद्घोष छ ।  
उनले अग्रगामी ऐन ल्याएर देशभरका १७ थरी शिक्षकको समस्या समाधान गर्नुपर्ने आवस्यकता औल्याए । ‘अहिले पनि सत्रथरी शिक्षकलाई पालिकै पिच्छे बनेका ऐनले शासन गरिरहेका छन्, तर संघिय शिक्षा ऐन नआएर सरुवा, बढुवा र सेवासुविधामा शिक्षक बञ्चित छन्’ सुवेदीले भने, ‘शिक्षक आन्दोलनले नै ऐन ल्याउन दवाव दिनेछ ।’ पटक पटकका सम्झौतालाई कमजोरी ठानेर सरकारले शिक्षा ऐन ल्याउन बेवास्ता गरेको उनको टिप्पणी छ । 
२०२८ सालमा आएको संघिय शिक्षा ऐनले अहिले सम्मपनि काम गर्न खोज्दा धेरै समस्या थपिएको उनले बताए । संविधान जारी भएपछि ६ महिना भित्र आउनुपर्ने ऐन नआएपछि पालिका तहमा शिक्षाको व्यवस्थापन हुन नसकेको सुवेदीो भनाई छ । 
‘यतिबेला शिक्षकलाई मात्र हैन, राज्यका हरेक निकायको सुदृढीकरणकालागि पनि ऐन चाहिएको छ, सुवेदीले भने,–‘अग्रगामी ऐन ल्याएर बिद्यालय शिक्षकका समस्याको समाधान गर्न अन्तिम चरणको आन्दोलन शुरु भएको छ, यो आन्दोलन पछि अब कुनै पनि शिक्षकहरु आन्दोलनमा आउनुपर्ने बाध्यता हुने छैन सवैले यो आशा गरौं ।’ सुवेदीले सबै मुद्दा समेटेर ऐन ल्याउनकालागि महासंघले सरकारलाई दिएको २४ बुँधे सुझाव कार्यान्वयन हुनुपर्ने भन्दै अबको आन्दोलनले पनि ऐन आएन भने कहिले पनि आउने संभावना नरहने बताए ।  सुवेदीले अबका दिनमा अस्थायी कोटा नराख्ने गरी ऐन ल्याउने, अस्थायी शिक्षकहरुकोपनि बिदा संचित गर्ने, सामाजिक सुरक्षा कोषमा आाधारित पेन्सनको व्यवस्था, बाल बिकासका शिक्षकको पनि प्राथमिकतह तृतिय श्रेणीको बराबर तलब हुनैपर्ने, योग्यता नपुगेका शिक्षक भए ससम्मान गोल्डेन ह्यान्सेक गरेर बिदाइ गर्ने लगायतको काम पनि छिटै गर्न महासंले सुझाव पेश गरेको बताए । 
शिक्षक आन्दोलनलाई कमजोर नठान्न पनि उनले राज्यलाई चेतावनी दिए । त्यतिमात्र हैन शिक्षकहरुलाईपनि आफ्नो पेशागत हितमा निडर भएर लाग्न र कक्षा कोठामा भने शिक्षक भएर पढाउन आग्रह गरे । ‘कक्षा कोठामा प्रवेश गरेपछि दक्ष शिक्षक भएर पढाउने हो, बालबालिका माथी कुनै आग्रह गर्नु भएन’ उनले भने, ‘पेशागत हितमा भने नाजायज सम्झौता गर्न सकिंदैन ।’ उनले कर्मचारीलाई राज्यले दिएको १० ग्रेड बराबर शिक्षकलाईपनि दिनुपर्ने बताए । अहिले शिक्षकलाई सरकारले ६ ग्रेड मात्र दिएको छ । 
पटकपटकका शिक्षक आन्दोलनले शिक्षा क्षेत्रमा सुधार ल्याएको, शिक्षकको पेशागत हितमा काम भएको पनि उनको दावी छ ।
कार्यक्रममा गण्डकी प्रदेशसभाका सदस्य तथा कांग्रेस बागलुङ सभापति जितबहादुर शेरचनले शिक्षकहरुको माग प्रति गम्भिर बनेको भन्दै संघिय संसदमा पहल गर्न पार्टीको नेतृत्व तहमा छलफल चलाउने आश्वासन दिए । उनले शिक्षकहरुको योगदानलाई उच्च मूल्यांकन गर्न पनि पार्टी पंत्तलिाई आग्रह गरेका थिए ।
शिक्षक संघको प्रतिनिधि सभाले चालुबर्ष निवृत्त भएका ३८ जना शिक्षक लाई सम्मान समेत गरियो । साथै यो बर्षको एसएलसीमा उत्कृष्ठ हुने बिद्यार्थी, बिभिन्न क्षेत्रमा योगदान गरेका शिक्षक र विभिन्न दुर्घटनामा परेका शिक्षकलाई मरणोपरान्त सम्मान पनि गरिएको थियो । 
नेपाल शिषक संघले १० वटै पालिकामा प्रतिनिधिसभा सम्मेलन गरेपछि प्रतिनिधिमूलक रुपमा जिल्ला सभा गरेको हो । जिल्ला सभामा ३ सय ५० बढी शिक्षक सहभािग थिए । जिल्लाभर संघमा आबद्द भएका १ हजार ४ सय ३९ जना शिक्षकले सदस्यता नविकरण गराएको अध्यक्ष उमाकान्त पौडेलले जानकारी दिए । 

कार्यक्रममा नेपाल शिक्षक संघ गण्डकी प्रदेशका बरिष्ठ उपाध्यक्ष सागर खरेल, बागलुङका पूर्व अध्यक्ष नारायण शर्मा पौडेल, नेपाली काँग्रेस गण्डकी प्रदेशका सदस्य एवं महिला संघ बागलुङ अध्यक्ष शकुन्तला शर्मा, महासमिति सदस्य भीम श्रीष, महाधिवेशन प्रतिनिधि चिरञ्जीवी गौतम, मञ्जेशबम मल्ल, शैक्षिक कल्याण कोषका अध्यक्ष बिष्णुप्रसाद सापकोटा, नेपाल ट्रेड युनियन कांग्रेस बागलुङका अध्यक्ष इश्वर ठाकुर पौडेल, नेपाल शिक्षक संघ बागलुङ नगरपालिकाका संयोजक घनश्याम रिजाल, ताराखोलाका संयोजक शिवप्रसाद निउरे, तमानखोलाका संयोजक गिता भुषाल खरेल लगायतले  शुभकामना व्यक्त गरेका थिए । 
प्रतिनिधि सभामा सचिव अर्थ कुल घर्ति मगरको आर्थिक प्रतिवेदन, सचिव लक्ष्मीकान्त पौडेलको सांगठनिक प्रतिवेदन र महिला विभाग प्रमुख तथा उपाध्यक्ष नन्दकुमारी ठकुरीको महिला विभाग प्रतिवेदन प्रस्तुत गरिएको थियो ।  सभाले तिनै जनाको प्रतिवेदन सर्वसम्मत पास गरेको छ । 
कार्यक्रम शिक्षक संघ बागलुङका अध्यक्ष उमाकान्त पौडेलको अध्यक्षता, सहसचिव लेखा कुमारी घर्ती बस्नेतको स्वागत सचिव लक्ष्मीकान्त पौडेल  र सहसचिव मदनबहादुर कार्कीको संचालनमा सम्पन्न भएको थियो ।