बागलुङ- मंगलबारदेखि देशव्यापी रुपमा सुरु भएको पाठेघरको मुखको क्यान्सर बनाउने ह्युमन प्यापिलोमा भाइरस (एचपिभी) विरुद्वको खोप अभियानअन्तर्गत पहिलो दिन बागलुङ जिल्लाका १९ सय ४१ जना किशोरीले एचपिभी खोप लगाएका छन् ।
अभियानअन्तर्गत बागलुङ नगरपालिकाका ७ सय ३२, जैमिनी नगरपालिकाका ३ सय ५५, गलकोट नगरपालिकाका ५ सय ४१, काठेखोला गाउँपालिकाका २ सय ७, ताराखोला गाउँपालिकाका ६३, बरेङ गाउँपालिकाका ४३ जना किशोरीले खोप लगाएको प्रदेश जनस्वास्थ्य कार्यालय बागलुङका खोप सुपरभाइजर राजु खत्रीले जानकारी दिए ।
अभियानको जिल्ला समन्वय समिति बागलुङका प्रमुख अमर बहादुर थापाले शुभारम्भ गर्नुभएको थियो । निमित्त प्रमुख जिल्ला अधिकारी पुष्पराज पौडेल, जनस्वास्थ्य कार्यालय, बागलुङ नगरपालिकाको समन्वयमा स्वास्थ्यकर्मी, महिला सामुदायिक स्वास्थ्य स्वयंसेवकाको उपस्थितिमा रुद्रेपिपल माविबाट एचपीभि खोप अभियान शुभारम्भ गरिएको हो ।
प्रदेशको स्थापना दिवसमा गण्डकी प्रदेश सरकारले सार्वजनिक बिदा दिएपछि तोकिएका कतिपय केन्द्रमा एचपिभी खोप लगाउने कार्य प्रभावित भएको छ । ‘बिदाका कारण केही केन्द्रमा खोप लगाउने काम हुन सकेन्’ खोप सुपरभाइजर खत्रीले भने, ‘अचानकको सार्वजनिक बिदाका कारण प्रभावित बनेको खोप कार्यक्रम केही विद्यालयमा भोलि बुधबार र केही विद्यालयमा अभियानको अन्तिम दिन खोप लगाउने काम हुनेछ ।’
बागलुङ जिल्लाका ११ हजार ५ सय ५५ जना किशोरीलाई एचपिभी खोप लगाउने प्रदेश जनस्वास्थ्य कार्यालयको लक्ष्य छ । माघ २२ देखि फागुन ३ गतेसम्म बागलुङका सबै किशोरीलाई एचपिभी खोप लगाईने प्रदेश जनस्वास्थ्य कार्यालयका निमित्त प्रमुख घनश्याम सापकोटाले जानकारी दिनुभयो । ६ देखि १० कक्षामा अध्यनरत १० देखि १४ वर्षसम्मका किशोरीहरुलाई खोप लगाइने छ ।
२२ देखि २८ गतेसम्म पहिलो चरणमा बागलुङ, जैमिनी, गल्कोट नगरपालिका, काठेखोला, बरेङ र ताराखोला गाउँपालिका तथा दोस्रो चरणमा माघ २८ गतेदेखि फागुन ३ गतेसम्म ढोरपाटन नगरपालिका, तमानखोला, निसीखोला र बडिगाड गाउँपालिकामा खोप लगाउने तालिका रहेको खोप सुपरभाइजर खत्रीले जानकारी दिए । खोप अभियान जिल्लाभर ३ सय १५ स्वास्थ्यकर्मी र ६ सय २६ जना संयसेविकाहरु परिचालन गरिएको छ भने ३ सय १२ खोप केन्द्र तय गरिएको छ ।