बागलुङ - जिल्लामा संचालन भएको सुरक्षित आप्रवासन (सामी) कार्यक्रम विदेश जाने र गएका नेपाली नागरिकलाई सहायोगी माध्यम बनेको एक कार्यक्रममा सहभागीले बताएका छन । सामाजिक विकास, युवा तथा खेलकुद मन्त्रालय गण्डकीको प्रदेशको आयोजना, जिल्लाका स्थानिय सरकारका प्रमुख तथा प्रतिनिधि र अन्य सरोकारवालाको सहभागीतमा आयोजित अन्तर सरकार समन्वय बैठकमा सहभागीले सो कुरा बताएका हुन । 
उनिहरुले सामी कार्यक्रमले बैदेशिक रोजगारीको योजना सँगै विदेशमा अलपत्र परेकालाई उद्धार गर्नुका साथै रोजगारीकै क्रममा ठगिएकाहरुलाई प्रशासन सँग सहकार्य गरी रकम फिर्ता गर्ने वातावरण बनाउँदै आएको बताए ।  सामी कार्यक्रमको बारेमा जिल्लाका चार नगरपालिका र ६ गाउँपालिकासँग अन्तर सरकार समन्वय बैठक भएको छ ।  बैठकमा बागलुङ नगरपालिकाका प्रमुख प्रशासकिय अधिकृत हरिदत्त कंडेलले जिल्लामा कार्यक्रमको गतिविधिका बारेमा जानकारी गराएका थिए । बागलुङका प्रमुख जिल्ला अधिकारी कुमान सिंह गुरुङले सामी कार्यक्रम र जिल्ला प्रशासनले गर्ने सहजीकरण र आवश्यक समन्वयका बारेमा जानकारी गराएका थिए । 
प्रशासन कार्यालयले वैदेशिक रोजगारीका क्रममा ठगिएका नागरिकको रकम असुलीका लागि समन्वय गर्दै आएको छ । यसका साथै ठगिका मुद्धाका लागि आवश्यक सहयोग पनि गर्दै आएको प्रमुख जिल्ला अधिकारी गुरुङले जानकारी दिए । बैठकमा गण्डकी प्रदेश सरकार सामाजिक विकास युवा तथा खेलकुद मन्त्रालयका उपसचिव प्रकाशचन्द्र ढुंगानाले प्रदेश संघ र स्थानिय सरकारले गर्ने कामका बारेमा जानकारी गराएका थिए ।
जिल्लामा बागलुङ नगरपालिद्धारा जिल्ला प्रशासन कार्यालयमा आप्रवासी श्रोत केन्द्र संचालन गरिएको छ भने इलाका प्रशासन कार्यालय बुर्तिबाङको श्रोत केन्द्रबाट वैदेशिक रोजगारीमा जान लागेका र गएकालाई आवश्यक परामर्श दिनुका साथै उद्धार र राहतका लागि पनि सहयोग गरिँदै आएको बागलुङ नगरपालिकाका नगरप्रमुख बसन्त कुमार श्रेष्ठले जानकारी दिए ।  श्रेष्ठका अनुसार केन्द्रबाट मनोसामाजिक परामर्श साथै वित्तिय साक्षरताका कार्यक्रमहरु पनि संचालन गरिँदै आएको छ । ०७६ साल देखी संचालन भएको श्रोत केन्द्रबाट हाल सम्म ३२ हजार ८४४ जनाले सूचना तथा परामर्श सेवा लिएका छन । केन्द्रले जिल्लामा ४०५ जनालाई मनोसामाजिक परामर्श सेवा प्रदान गरेको बताईएको छ ।  सामी कार्यक्रम मानव जिवनसँग जोडिएको कार्यक्रम रहेको हुँदा स्थानिय सरकारले पनि यसलाई प्राथमिकतामा राख्नुपर्ने सामी कार्यक्रम गण्डकी प्रदेशका संयोजक उमा शर्माले बताईन । उनले कार्यक्रम मार्फत धेरै नेपाली नागरिकको उद्धार भएको जानकारी दिईन । 
कार्यक्रममा जिल्ला समन्वय समितिका प्रमुख अमर बहादुर थापाले पछिल्लो समयमा जिल्लाबाट वैदेशिक रोजगारीमा जानेको संख्या झनै बढ्दै गएको हुँदा स्थानिय सरकारले युवा लक्षित कार्यक्रम र स्वरोजगार हुने कार्यक्रम ल्याउन जरुरी रहेको बताए । उनले स्थानिय सरकारले नीतिगत रुपमा नै युवाहरुलाई यही स्वरोजगार मुलक कार्यक्रमको व्यवस्थापन गर्न सकेमा वैदेशिक रोजगारमा जाने युवाको संख्यामा समेत कमी बताए । थापाले सामी कार्यक्रम मार्फत धेरै नागरिक सुसुचित भएको बताए । 
कार्यक्रममा गलकोट नगरपालिकाका नगरप्रमुख भरत शर्मा गैरे, बडिगाड गाउँपालिकाका उपाध्यक्ष भिमसेन वन लगायतले स्थानिय तहले संघ र प्रदेश सरकारसँग समन्वय गरेर कार्यक्रम संचालन गर्ने बताए । बैठकमा वैदेशिक रोजगारीको सिलशिलामा भोगेका अनुभवहरुलाई पिडितहरुले सुनाएका थिए । यसका साथै मनोसामाजिक परामर्शद्धारा जिवनमा आएको परिवर्तनका बारेमा सेवाग्राहीले अनुभव साटेका थिए । 
कार्यक्रम बागलुङ नगरपालिकाका नगरप्रमुख बसन्त कुमार श्रेष्ठको अध्यक्षता उपप्रमुख राजु खड्काको स्वागत र प्रशासकिय अधिकृत भिमसेन पन्तको संचालनमा सम्पन्न भएको थियो ।