बागलुङ -पूर्वराजा ज्ञानेन्द्र शाहले बुधवार बागलुङ कालीका भगवती मन्दिरको दर्शन गर्नुका साथै पुजा अर्चना गरेका छन ।  बुधबार दिउँसो करिब १ बजेको समयमा पारिवारिक र धार्मिक भ्रमणका लागि बागलुङ आएका शाहले झण्डै २० मीनेट मन्दिर भित्रै बसेर पुजा अर्चना गरेका थिए । 
कडा सुरक्षाका साथ मुल सडकबाट पैदल यात्रा गरी मन्दिर पुगेका थिए । बागलुङ कालीका भगवती गुठी व्यवस्थापन समितिले उनलाई मन्दिर भित्रै पसेर पुजा गर्ने प्रबन्ध गरेको थियो । 
उनलाई बाटोमा सयौं नागरिक उपस्थित भएर स्वागत गर्नुका साथै पञ्चेबाजा, भजन समूह र अन्य झाँकीसहित तामझामका साथ जयजयकार गरिएको थियो । शाहको स्वागतका लागि अधिकाशं राप्रपा समर्थक नेता तथा कार्यकर्ता थिए भने केही काँग्रेस र कम्युनिष्टका नेता तथा कार्यकर्ता पनि देखिन्थे । 
बागलुङका स्थानीय जब्बरबहादुर लामिछानेको संयोजकत्वमा ५ सय १ सदस्य रहेको नागरिक स्वागत मूल समारोह समिति गठन गरि शाहको स्वागतका लागि शिव सेवा लेखेको टिसर्ट र ज्याकेट लगाएका  स्वयंसेवक समेत खटिएका थिए । सहभागीले  राजा आउ देश बचाउ, हाम्रो राजा हाम्रो देश प्राणभन्दा प्यारो छ लगायतको नारा लगाएका लगाएका थिए । 

पुजा गरिसकेपछि स्वागत समिति अन्र्तगत कार्यसम्पादन समितिका पदाधिकारीले शाहलाइ भेटेर सक्रिय हुन सुझाव समेत दिए । शाहलाई स्वागत गर्न पर्वतबाट पनि राप्रपाका कार्यकर्ता, स्वतन्त्र नागरिकहरु समेत मन्दिरमा आएका थिए । बुधबारै शाह बागलुङ कालीकाबाट निस्केपछि म्याग्दीस्थित गलेश्वरमा पनि दर्शन गरेका छन ।