बागलुङ- नेपाली कम्युनिस्ट पार्टी (नेकपा) जिल्ला समिति बागलुङले मंसिर महिना भित्रै जिल्ला तहको एकता सम्मेलन गर्ने भएको छ । गत कात्तिक २१ गते केन्द्रीय तहमा एकता सम्मेलन सम्पन्न गरी पार्टी घोषणा भएपछि प्रदेश र जिल्ला तहमा नयाँ संरचना निर्माण तीव्र रूपमा अघि बढाइएको पार्टीले बताएको छ ।
तत्कालीन नेकपा माओवादी केन्द्र, नेपाल कम्युनिस्ट पार्टी (एकिकृत समाजवादी)सहितका १२ बाम घटकहरूको एकताले गठन भएको नयाँ पार्टीको संयोजकमा पुष्पकमल दाहाल र सहसंयोजकमा माधवकुमार नेपाल रहेका छन् । केन्द्रीय घोषणा पछि प्रदेश र जिल्ला तहमा संगठन पुनःसंरचना सुरु भएको बिहिबार पत्रकार सम्मेलन गरि जानकारी गराइएको छ । 
नवगठित नेकपा बागलुङका संयोजक प्रकाश घर्तीले केन्द्रमा एकता भएपछि देशभरी एकता प्रक्रिया अगाडी बढेको बताउँदै मंसिर महिनाभित्र जिल्लामा एकता सम्मेलन गर्ने गरी अगाडी बढिएको बताए । उनले गण्डकी प्रदेशको एकता सम्मेलनपछि जिल्ला र वडासम्म एकता सम्मेलन हुने बताए । 
घर्तीले बुधबार सम्पन्न प्रारम्भिक जिल्ला कार्यसमितिको बैठकमा पाँच बुँदे निर्णय भएको जानकारी दिए । उनले पार्टी एकता सन्देशसभा र विद्यमान परिस्थितिबारे आमजनतामा सम्प्रेषणको प्रदेशस्तरीय सन्देशसभामा जिल्लाबाट अधिकतम उपस्थिति गराउने, जिल्लामा गरिने एकता सन्देश सभालाई व्यवस्थित गर्ने, एकता सन्देश सभामा उपस्थित हुन जेनजी समुहलाई विशेष अपिल गर्ने र राजनैतिक नेतृत्वमा देखिएको संकट र सवै दलका नेतृत्व एउटै हो भन्ने गलत भास्यलाई बारेज गर्ने निर्णय भएको बताए । 
कार्यक्रममा केन्द्रीय सदस्य चन्द्रबहादुर बुढाले नेकपाले जेनजीहरुले उठाउँदै आएको मुद्धाको पक्षमै रहेको बताउँदै हाल एकता भएका दलहरुले पहिलेबाट हाल जेनजीले उठाएका मुद्दा उठाएको बताए । उनले भ्रष्टाचार, दण्डहीनता र मूल्यवृद्धिले देश जर्जर बनेको भन्दै नयाँ बाम शक्तिको एकतामार्फत राजनीतिक संकट समाधान हुने दाबी गरे । उनले जनयुद्ध र जनआन्दोलनपछिको राजनीतिक अवस्थालाई सुरक्षित अवतरण गराउन तत्कालिन नेकपा माओवादी केन्द्रका अध्यक्ष पुष्पकमल दाहाल प्रचण्ड र नेकपा (एकिकृत समाजवादी)का अध्यक्ष माधवकुमार नेपालले नेतृत्वदायी भूमिका निर्वाह गरेको बताए ।  
नेकपा बागलुङका सह–संयोजक पिंगलराज गौतमले वर्तमान चुनौतीपूर्ण परिस्थितिमा आफू र संयोजक घर्ती सक्रिय नेतृत्वमा रहेको बताउँदै मंसिर महिनाभित्रै एकता सम्मेलन गर्ने बताए । त्यस्तै, केन्द्रीय सदस्य कमल घिमिरेले पनि एकता प्रक्रियालाई दृढतापूर्वक अघि बढाउनुपर्नेमा जोड दिए ।