बागलुङ - बागलुङको निसीखोलामा सोमबार साँझ बस दुर्घटना हुँदा ७ जनाको मृत्यु २५ जना घाईते भएका छन । निसीखोला गाउँपालिका—६ जाउलेपानी भन्ने स्थानमा  बागमती प्रदेश ०१–००६ ख ३८७९ नम्बको बस दुर्घटना भएको हो । घटनास्थल पुगी उद्धारमा खटिएका इलाका प्रहरी कार्यालय बुर्तिबाङका प्रहरी निरिक्षक राजकुमार विकका अनुसार हाल सम्म ७ जनाको मृत्यु भएको छ भने २५ जना घाईतेको उद्धार गरी थप उपचारका लागि बुर्तिबाङ प्राथमिक स्वास्थ्य केन्द्रमा पठाउने काम भै रहेको छ । 
साँझ परिरहेको हुँदा घटनास्थलामा उद्धारका लागि कठिनाई भएको विकले जानकारी दिए । पश्चिम रुकुमबाट काठमाण्डौंका लागि छुटेको बस मध्यपहाडी लोकमार्ग देखी अन्दाजी १ सय ५० मिटर तल खसेको जिल्ला प्रहरी कार्यालय बागलुङका प्रहरी नायव उपरीक्षक मदन केसीले जानकारी दिए । घटनामा अझै थप घाईते भएको आशंका गरिएको छ । उनिहरुको उद्धारको काम चलिरहेको छ । घाईतेहरुको अबस्था गम्भिर रहेको घटनास्थलमा पुगेका निसीखोला गाउँपालिकाका अध्यक्ष सुर्यबहादुर घर्तिमगरले जानकारी दिए । दुर्घटनामा घाईत र मृत्यु भएका सवैको पहिचाहन नखुलेको प्रहरीले जनाएको छ । दुर्घटना के कारणले भएको भन्न अझै खुलेको छैन ।