बागलुङ - बागलुङ नगरपालिका स्वास्थ्य शाखाले विश्व क्षयरोग दिवसको सन्दर्भमा सरोकारवाला निकायको बीचमा अन्तरक्रिया कार्यक्रम सम्पन्न गरेको छ । सोमबार दिवसको सन्दर्भ पारेर आयोजना गरिएको अन्तरक्रिया कार्यक्रममा बागलुङ नगर स्वास्थ्य शाखा प्रमुख रामप्रसाद खनालले क्षयरोगले विश्वमा वार्षिक एक करोड हाराहारीका मानिसको मृत्यु हुने गरेको बताए । 
‘हामीले विभिन्न समयमा महामारी आउँदा धेरै चासो र चिन्ता लिने गर्छौं,’उनले भने,‘अहिले पनि वार्षिक १० मिलियन भन्दा बढि मानिस क्षयरोगका कारण विश्वमा मर्ने गरेका छन् । त्यसैले यसको रोकथामका लागि सबैले चासो र ध्यान दिनु जरुरी छ ।’ गत आर्थिक वर्षमा बागलुङ नगरपालिका भित्र मात्रै ३ जना क्षयरोगीको मृत्यु भएको छ । ‘समयमै रोग पत्ता नलाग्दा र उपचारमा ध्यान नदिंदा मृत्यु हुने सम्भावना हुन्छ,’उनले भने,‘राम्रोसंग बेलेमा रोगको पहिचान गरी नियमित औषधी सेवन गरेमा ६ महिनादेखि एक वर्षमा क्षयरोग निको हुन्छ ।’ 
कतिपय क्षयरोगहरु भने दुई वर्षसम्म पनि निको नहुने गरेको उनले बताए । यो आर्थिक वर्षमा बागलुङमा ९ महिला र १८ पुरुष गरी २७ जना क्षयरोगीका विरामी पहिचान भएर औषधी सेवन गरिरहेको खनालले बताए । क्षयरोगका कारण रोग प्रतिरोधात्मक क्षमता कमजोर हुने र त्यसबाट अन्य रोगका संक्रमण जोखिम हुने पनि उनले जानकारी दिए । एचआईभी संक्रमितहरुलाई क्षयरोगको सबैभन्दा धेरै जोखिम रहेको खनाललको भनाई छ । 
क्षयरोगबाट बच्नका लागि जन्मेपछि बिसीजी खोप लगाउने र क्षयरोगीको पहिचान भएर छिटो उपचार गराउनुपर्ने उनको भनाई छ । क्षयरोगीको खकार र हावाको माध्यमबाट यो रोग सर्ने भएकाले सतर्क रहनुपर्ने भन्दै उनले नियमित औषधी सेवन गरेपछि अन्य व्यक्तिमा क्षयरोग नसर्ने बताए । एउटा क्षयरोगीले १५ देखि २५ जनासम्म स्वस्थ व्यक्तिलाई क्षयरोग सार्नसक्ने उनले बताए । कार्यक्रममा बागलुङ नगर अस्पतालका डा. सन्तोष आचार्य र नेपाल पत्रकार महासंघ बागलुङका सचिव नारायण रिजाल लगायतले मन्तव्य राखेका थिए ।